د بامیانو ولایت ابتدایه محکمه د دغه ولایت د پوهنې په ریاست کې د اداري فساد د سترې دوسیې له څېړلو وروسته پرون (سه شنبه، د مې په ۲۴مه) ورځ د دغه ریاست ۱۲ لوپوړي مامورین په ترتیب سره له ۱۵ ورځو تر ۶ کلونو بند باندې محکوم کړل.
همدا ډول د دې محکمې د څېړنو په پایله کې د پوهنې ریاست ۷ تنه نور مامورین په نقدي جریمو محکوم شول.
یوې سرچینې د نوم نه خپرولو په شرط سلام وطندار ته وویل، چې د بامیانو ولایت د پوهنې ریاست رییس محمد رضا داد په ۶ کلونو بند او له ۸ میلیونو په زیاتو افغانیو نقدي جریمې، د دې ریاست د پوهنې پخوانی رییس محمدعلي واثق په ۳ کلونو بند او له درې میلیونو په زیاتو افغانیو نقدې جریمې، د شېبر ولسوالۍ د پوهنې امر سلطان علی په شپږکلونو بند او نږدې د ۸ میلیونو افغانیو په نقدي جریمې، د ورس ولسوالۍ د پوهنې امر حسین علي په ۳ کلونو تنفیذي بند او د نږدې د څلورو میلیونو افغانیو د نقدي جریمې په پرېکولو محکوم کړل.
.jpg)
همدا ډول د کهمرد ولسوالۍ د پوهنې امر غلام دستګیر د جعلي اسنادونو د جوړولو په جرم، د پوهنې ریاست اداري مرستیال غلام حسین، د انساني سرچینو مدیر میرحسین، د ګومارنې مدیریت مامور بسم الله، د پوهنې د سوانحو مدیر محمد شریف او د پنجاب ولسوالۍ د پوهنې امر سیدجواد د وظیفوي بې غورۍ له امله له یوې میاشتې تر ۵ کلونو په تنفیذي بند او د نقدي جریمې په پرېکولو محکوم شوي دي.
د ابتدايي محکمې له خوا د فساد په دې دوسیې کې د بامیانو ولایت د ۶ تنو معلمانو نومونه هم شامل دي، چې په څو میاشتو بند او نقدي جریمې محکوم شوي دي.
دغې سرچینې سلام وطندار ته وویل، چې "د بامیانو د پوهنې ریاست د ستر فساد په دوسیه" کې د دغه ولایت د پوهنې ریاست د یو زرو ۱۰۰ تنو مامورینو نومونه ذکر شوي دي. ده وویل، چې له دې شمېره نه ۲۲۹ تنه خیالي استادان دي.
دغه لانجمنه دوسیه شاوخوا ۸ میاشتې مخکې د بامیانو ولایت د ابتدایه محکمې له لوري برابره شوه او په دې دوسیه کې کې نږدې ۹۰ میلیونه اختلاس شوی و.
