د افغانستان کرکټ بورډ له خوا اخر هم نن سه شنبه (می۱۷مه) په یوه خبري غونډه کې د پاکستانې میلمه (حبیب بینک) لوبډلې خلاف سیالیو ته د افغانستان پرمختیایي کرکټ لوبډلې د کپتان معما پای ته ورسیده.
کرکټ بورډ په رسمي توګه اعلان وکړ، چې د پاکستان (حبیب بینک) لوبډلې خلاف به ۲ څلور ورځنیو سیالیو کې ځوان بیټسمین نجیب الله ځدران د پخواني کپتان نوروزمنګل ، پخواني کپتان حمید حسن، پخواني مرستیال کپتان جاوید احمدي او د ۱۹ کلنې لوبډلې پخواني کپتان ناصرجمال احمدزي په شتون کې کپتان وي، چې دا به یې په کورني او نړیوال کرکټ کې د کپتانۍ لومړی تجربه وي.
نجیب الله ځدران نن د کرکټ بورډ د چارواکو په شتون کې له میلمه پاکستانۍ حبیب بینک لوبډلې کپتان ټیسټ کرکټر عمران فرحت سره په خبري غونډه کې راښکاره شو.
د افغانستان پرمختیایي کرکټ لوبډلې کپتان نجیب الله ځدران په خبري غونډه کې وویل، چې د ځوانې لوبډلې کپتاني پر غاړه لري، خو د حبیب بینک لوبډلې خلاف ښې لوبې وکړي.
افغان کپتان له مینه والو وغوښتل، چې د کرکټ لوبو څخه د خوند اخیستلو او دواړو لوبډلو د هڅونې په موخه کابل کرکټ لوبغالي ته ورشي.
دغه راز په خبري غونډه کې د پاکستانۍ میلمه (حبیب بینک) لوبډلې کپتان ټیسټ کرکټر عمران فرحت د افغانانو او افغان کرکټ بورډ له میلمه پالنې مننه وکړه.
د نوموړي په وینا، کابل ته له افغان کرکټ لوبغاړو سره د کرکټ تجربو تبادله کولو په موخه راغلي دي او باور لري چې افغان کرکټ مینه وال به د دوی له سیالیو ښه خوند واخلي.
دغه راز د افغانستان کرکټ بورډ مشرانو په رسنیزه غونډه کی وویل، چې کابل د لومړي ځل له پاره د یوې بهرنۍ لوبډلې کوربه دی او تمه یې وښوده، چې ورسره به په افغانستان کې د نړیوالو سیالیو د کوربتوب کلتور ته وده ورکړي.
د کرکټ بورډ مشرنسیم الله دانش له پاکستاني کرکټ بورډ او حبیب بینک لوبډلې له چارواکو څخه مننه وکړه، چې افغانستان ته یې د مشهوره لوبغاړو په شتون کې لوبډله راولیږله او زیاته یې کړه، چې له ځان سره به ښې خاطرې پاکستان ته یوسي.
ټاکل شوې وه د دواړو افغان پرمختیايي او حبیب بینک لوبډلو ترمینځ سیالۍ د روانې (می) میاشتې په ۱۷ مه نیټه پیل شوې وای، خو اوس به دغه سیالۍ د ۱ ورځې په ځنډ سره سبا په کابل الکوزي کرکټ نړیوال لوبغالي کې په لومړۍ ۴ ورځنۍ سیالۍ سره پیل شي.
دواړو لوبډلو نن په کابل-الکوزي کرکټ نړیوال لوبغالي کې د سبا ورځې اوږدې ۴ ورځنۍ سیالۍ له پاره په کابل کې خپل تمرینات ترسره کړل.
