د سوريې په شمال کې د کردانو له پاره د نیمه خپلواک یا فډرالي نظام له وړاندیز وروسته د دغه هېواد د سولې خبرې اترې په درېیمه ورځ له کړکېچ سره مخ شو.
دغه وړاندیز د سوري کردانو له خوا شوی دی.
په دې وروستيو کې په سوریه کې د دغه هېواد ۵ کلن جنګ ته د پای ټکي اېښودو په هدف خبرې اترې روانې دي او داسې هيلې موجودې وې، چې د سوريې څخه د روسي ځواکونو وتلو وروسته د دواړو غاړو ترمنځ ډز بند اعلان شي او د امریکا او روسيې په ډيپلوماټیکو هڅو سره د سوريې کړکېچ پای ته ورسول شي.
د ملګرو ملتونو سازمان هم هیله درلوده، چې د امریکا او روسيې هېواد په همکارۍ په سوریه کې د جګړې پر دواړو غاړو فشار راوړي، ترڅو د خبرو اترو میز ته حاضر شي.
څو ورځې وړاندې په سوریه کې کردي حزبونو اعلان وکړ، چې دوی د دغه هېواد په شمال کې د فډرالي حکومت د جوړېدو له پاره پر يو پلان کار کوي.
د سوريې د موکراتیک اتحاد ګوند غړی نواف خلیل وايي، چې د دوی د حزب غړي د کردانو له پاره نه، بلکې د ټولې سوريې له پاره فډرالي نظام غواړي.
د امریکا متحده ایالات او ترکیه هم نه غواړي، چې په سوریه کې دې د کردانو له پاره فدرالي نظام جوړ شي.
د سوريې د دولت استازي رییس بشار جعفري په سوریه کې د فدرالي نظام له جوړېدو سره د مخالفت ترڅنګ وايي، چې دوی نه غواړي د اپوزیسیون له استازو سره مخامخ خبرې اترې وکړي.
هغه ویلي، چې دغه وړاندیز د کردانو له خوا شوی او دوی اوسمهال د داعش ډلې سره مبارزه کوي او دوی د کلونو راهیسې د سوريې یوه برخه وه.
له بل لوري د سوريې د بهرنيو چارو وزیر ولید معلم د غربي هېوادونو او ملګرو ملتونو مشرانو ته وویل، چې دمشق به هيڅکله هم په خپل بحث کې د فډرالیزم موضوع شامله نه کړي.
