د پنجشنبې پر ورځ د المان په مونیخ کې د سوري د سولې په اړه د شلو هېوادونو په ګډون غونډه جوړه شوه، چې د غونډې ګډونوال په سوریه کې پر اونیز اوربند باندې پرېکړه وکړه.
د یورو نیوز د خبر پر بنسټ، د امریکا د بهرنیو چارو وزیر جان کيري د دې غونډې هغه هوکړه لیک، چې له مخې یې په سوریه کې د یوې اونۍ له پاره پر اوربند فیصله شوې؛ اعلان کړ.
د هېوادونو استازي د دې هوکړې پر اساس دې پایلې ته ورسېدل، چې مرسته کوونکې ادارې به د ټولو هغو سیمو ملکي خلکو ته مرستې رسوي، چې یا کلابند دي او یا له جګړې زیانمن شوي دي.
یورو نیوز لیکي، د هوکړه لیک په متن کې د اوربند پر ځای (د دښمنیو درول) کارول شوي دي.
سرګې لاوروف او جان کيري، دواړه د دې توافق څخه خوښ برېښي او دا هوکړه یې ګټور بللی ده.
ویل کېږي، په دې توافق کې یوازې د انساني مرستو د دوستانه وېش په اړه خبرې شوي، د سیاسي او جنګي مسایلو په اړه په کې بحث نه دی شوی.
په ورته وخت کې د ژنوا د سولې خبرو د ماتولو او د مونیخ د خبرو د پیلېدلو سره سوريې ویلي، د دې هېواد په بېلابېلو برخو کې د روسيې هوایې بریدونو بېلابېلې لاسته راوړنې لرلي، خو په ورته وخت کې دې بریدونو درانه انساني تلفات هم اړولي دي.
یواېې په تېرو لسو ورځو کې د روسيې په هوایي بریدونو او د سوريې ځواکونو په مخکې تګ کې ۵۰ زره سوریایي وګړي بې ځایه شوي دي او په لسګونو زرو نورو وګړیو د ترکيې مرکز ته پنا وړې ده.
تر اوسه ترکيې د نړیوالې ټولنې د غوښتنې پر خلاف خپلو سرحدونه د سوريې پنا غوښتونکیو پر وړاندې نه دي پرانيستي.
