ماليې وزارت د غزني د ۲۰ هنرونو د راژوندي کولو ۱۷ میلیونه نه ورکوي

د غزني ولایت د سوداګرۍ او صنایعو ریاست مسوولان وايي، چې ماليې وزارت د دې ولایت د لاسي صنایعو ریاست ۱۷ میلیونه ډالره اختصاص شوې پیسې نه مني. دغه پیسې د وزیرانو په شورا کې د ۱۳۹۴ کال له بودیجې څخه په غزني کې د ۲۰ لاسي هنرونو د راژوندي کولو له پاره اختصاص شوې وې.

د غزني ولایت د سوداګرۍ خونې او صنایعو رییس حسین عارفي سلام وطندار ته وویل، چې څو ځلې یې له مالیې ورازت نه غوښتنه کړې ده، چې دوی ته د ۱۷ میلیونو ډالرو په اړه معلومات ورکړي، خو د دغه وزارت ځوابونه په هېڅ ډول د منلو وړ نه وو.

عارفي وايي، د دې پیسو له جملې نه ۱۰ میلیونه ډالر، د قالینو د اوبدلو صنعت، تار جوړولو او رنګ امېزۍ او ۷ میلیونه یې، مسي صعنت، خامک، چپن ګنډلو، ګلیم اوبدلو او جوال اوبدلو ته ځانګړې شوې وې.

د غزني د سوداګرۍ او صنایعو رییس وايي، چې اوسمهال د دغه ولایت د لاسي صنایعو خام مواد پاکستان ته ځي او د هغوی په ګټه کارول کېږي. د ده پر وینا، هره ورځ د غزني ۱۰ ټنه پشم پاکستان ته صادرېږي او د دغه هېواد د رسي جوړونې صناعت کې ترې کار اخیستل کېږي.

د عارفي پر وینا، په غزني کې په لاسي صنایعو پانګونه، د فرهنګي ارزښتونو د ساتنې تر څنګ، خلکو ته د کاري زمینې اسانتیاوې پیدا کوي.

غزني ولایت په مسي صنایعو، چرمي صنایعو او د قالینو په اوبدلو کې ځانګړی شهرت لري، چې د رنګارنګ ښایسته نقشونو په لرلو سره د مسکو او واشنګټن بازارونو ته لېږدول کېږي.

اوس مهال د دغو صنایعو ځای د پاکستان او چین هېواد څخه وارد شویو پلاستیکي لوښو نیولی دی او دغه صنعت تش په نوم د یو کسب په ډول پاتي دی.

امیر محمد چې له عمره پوخ دی او د نیکونو له وخته د مسي صنعت کار کوي. نوموړي اوس مهال د پانګې نه لرلو او د دې صنعت د بازار نشتوالي له امله په خپل کور کې دغه صنعت مخ ته وړي.

امیر محمد په خپل لاس جوړ کړي لوښي د پلورلو له پاره بازار ته را وړي وو، ده شکایت وکړ، چې اوس دغه لوښي بازار نه لري.

دی وايي، چې څو کالونه پخوا د ده ملګرو د حکیم صاحب په بندر کې شاوخوا ۱۰۰ هټي او د زوړ ښار په سیمه کې د مسي صنعت ۲۰ هټي لرل.

د ده په خبره، د کار ټول لوښي به دغو مس ګرو جوړول او هیڅ ډول لوښی به له بهر څخه نه راوړل کېدل. ده وویل، خو نن سبا یوازې ټول بازار کې د مسي کولو صنعت درې دوکانونه پاتې دي او بس.

د غزني ولایت معماري او لاسي صنایع یو وخت نړیوال شهرت لرلو او د غزنویانو د لرغوني کلتور استازتوب یې کولو. خو نن ورځ دغه ټول هر څه د غزني د بازار او صنعت کمه برخه تشکیلوي.

د غزني ولایت صنعت ګران اندېښنه لري، چې که چېرې له دې مسلې حکومت ملاتړ ونه کړي؛ نو د دغه ولایت لاسي صنایعو کار به له منځه لاړ شي.

موږ د غزني د سوداګرۍ او صنایعو ریاست د ۱۷ میلیونو ډالرو د غوښتنې په اړه له مالیې وزارت سره اړیکه ونیوله، خو د هغوی دلیل دا و، چې دوی په دې اړه له یاد ریاست سره خبرې کړي دي. دا چې کوم ډول خبرې؛ په دې اړه یې څه ونه ویل.