د ولسي جرګې غړي د هېواد اوسني حالاتو ته په کتو سره وايي، چې په دې وروستيو کې د افغانستان امنيتي وضعيت مخ په خرابېدو دی او دغه چاره دوی سخت اندېښمن کړي دي.
د يادې جرګې غړي زياتوي، چې باید د امريکا سره امنيتي تړون لغوه شي، ځکه د دوی په وينا له دغه هېواد سره امنيتي تړون د افغانستان په ګټه نه ده تمام شوې.
د ولسي جرګې مشر عبدالروف ابراهیمي په نننۍ ناسته کې ولسمشر غني په دروغو تورن کړ او ویې ویل، ولسمشر ویلي وو، چې له ۷۰ تر ۸۰ سلنو پورې وخت به د امنیت په ښه کولو ولګوي، خو د هغه ټولې خبرې له دروغو پرته نور څه نه وو.
د ابراهیمي په خبره، د افغانستان شمال په وزیرستان بدل شوی او که چېرې حکومت ورته پاملرنه ونه کړي؛ د شمال لویې لارې به ډېر ژر د وسله والو مخالفینو له خوا وتړل شي.
د فراه ولایت د خلکو استازي سرور عثمان فراهي په نننۍ ناسته کې وویل، چې حکومت دې د امنیتي قرارداد له لغوه کولو وروسته د دولتي دارايیو او پراختیايي پروژو پر ځای پوځي وسایل واخلي او له خلکو سره یو ځای دې د وسله والو مخالفینو په مقابل کې وجنګېږي.
د ولسي جرګې مشر وویل، د ولسي جرګې دار الانشاء ته یې دنده ورکړې، چې ژر تر ژر په یوه رسمي لیک کې له دولته وپوښتي، چې افغانستان او امریکا هېوادونو له خوا د امنیتي قرارداد د امضاء په اړه کمېسیونونه جوړ شوي او که نه؟
په هېواد کې د نا امنیو له زیاتېدو سره سم، په افغانستان کې د امریکايي ځواکونو په شتون د ولسي جرګې له خوا اعتراضونه زیات شوي دي.
د ننګرهار له خونړۍ پېښې وروسته، د ولسي جرګې یو شمېر غړیو د امنیتي تړون مشروعیت تر پوښتنې لاندې راوست او ویې ویل، چې دغه تړون د دې لپاره امضاء شوی، چې امریکايي ځواکونه د امنیتې پېښو مخنیوی وکړي.
د ولسي جرګې د غړیو په خبره، که چېرې امریکايي ځواکونه نه شي کولی د نا امنیو مخه ونیسي؛ نو دغه تړون افغانستان ته ګټه نه لري.
