د امام صاحب ولسوالۍ ځنګلونه د وسله والو پر پټن ځایونو بدل شوي

د کندوز ولایت امام صاحب ولسوالۍ د هېواد په شمال کې له تاجکستان سره پرپوله پرته ده چې د آمو سیند غاړې او د امام صاحب یوشمېر سیمې ځنګلونو پوښلې دي.

ددې ولسوالۍ یو شمیر اوسیدونکي وايي له تاجکستان سره پولې ته څیرمه ځنګلونه بهرنیو او کورنیو وسله والو د ماینونو جوړلو، د ځوان نسل له پاره د دولت پرضد روزنیز پروګرامونو او ځان مرګو پرمرکز بدل شوي دي.

دغه راز، دوی وايي، چې په دې ولسوالۍ کې د جګړې او د افغان ملي ځواکونو د توپونو د ډزو له امله ۲۰۰۰ کورنۍ له خپلو ځایونو بې ځایه شوې دي.

په دې اړه د سیمې اوسیدونکو سلام وطندارته وویل، چې ځنګلونه د وسله والو طالباانو پر مرکزونو بدل شوي او همدلته روزل کیږي ځانمرګي هم له همدې ځایه راځي.

د کندوز امنیه قوماندان جنرال محي الدین غوري هم مني، چې د امام صاحب ځنګلونه د وسله والو طالبانو پر مرکزونو بدل شوي دي، خو زیاتوي چې دغه پټن ځایونه به ډير ژر له منځه یوسي.

له بل لوري د امام صاحب ولسوال امام الدین قریشي وايي چې ددې ولسوالۍ پر ۴۰ سلنه سیمو واک لري او زیاتوي که د وسله والو پر ضد ژر عملیات پیل نه شي دې سیمو ته به سرخوږی جوړ کړي.

وسله والو طالبان د کندز مرکز د سقوط پرمهال دا ولسوالۍ هم د لنډې مودې له پاره نیولې وه.

ددې ډلې غړي د امام صاحب برسېره یوشمېر نورو سیمو کې هم فعالیت کوي او چارواکي اوسنی موسم  د دوی د له منځه وړلو له پاره مناسب بولي.