زابل ولايت کې یوه امنیتي سرچینه د نوم نه خپرولو په شرط سلاموطندار ته وايي، تېره ورځ د ياد ولايت امنيې قومندانۍ کې يوه پوليس ځان په دار ځړولی دی.
سرچينه وايي، دغه پوليس چې محمد رسول نومېده او ۳۵ کاله يې عمر درلود د قومندانۍ په خوړنځي کې ځان په دار ځړولی.
د معلوماتو له مخې د ياد کس د دغې کړنې انګېزه لا معلومه نه ده؛ خو ويل کېږي چې نوموړي د کورنۍ او اقتصادي ستونزو له کبله ځان وژلی دی.
د زابل د امنیې قومندانۍ ویاند لعل محمد اميري بیا وايي چې په دې اړه به د څېړنو له بشپړولو وروسته رسنیو سره معلومات شریک کړي.
دا په داسې حال کې ده چې د زابل مدني فعالان وايي، ډېری وخت د پوليسو معاشونه ځنډېږي چې له کبله يې داسې پېښې کېږي.
