د ولسي جرګې په نننۍ عمومي غونډه کې د زابل ولایت وروستۍ پېښې په اړه او د ننګرهار، هلمند، بدخشان او نورو ولايتونو د امنيتي وضعیت د خرابېدو په باب وکيلانو خپلې اندېښنې په ډاګه کړې.
په دغه غونډه کې د یو شمېر وکيلانو له لوري وړاندیز وشو، چې باید د ولسي جرګې د دواړو خونو له لوري يوه ګډه غونده جوړه شي او ولسمشر محمد اشرف غني او اجرايوي رییس عبدالله عبدالله دې د وکيلانو پوښتنو ته ځواب ووايي.
د يادې جرګې غړي داود کلکاني وویل، دی په دې اړه د وکيلانو څو لاسلیکونه راټول کړي او هڅه کوي، چې په دې اړه د مشرانو جرګې د غړو لاسلیکونه هم واخلي.
همدارنګه د ولسي جرګې د غړو له خوا په زابل ولایت کې د ښځو او ماشومانو په ګډون د ۷ کسانو وژل کېدل هم په کلکو ټکو وغندل شول.
ولسي جرګې په دې اړه د يوې اعلاميې په خپرولو سره وویل،، چې د دغو هېوادوالو د سر غوڅولو یواځنی هدف په افغانستان کې د قومونو ترمنځ د تفرقې اچول وو، چې د افغانانو له لوري د دوی دغه توطیه هم ناکامه شوه.
په دې اړه نن په کابل ښار کې زرګونو کسانو هم لاریون وکړ، چې په وروستي وخت کې د ولسمشرۍ ماڼۍ د ساتونکو له لوري د هوايي ډزو له امله لاریون کوونکي تيت او پرک شول.
د ولسي جرګې مشر عبدالروف ابراهيمي وویل، چې د زابل د تېرې ورځې پېښې او د نن ورځې لاریون وښوده، چې افغانان سره يو دي.
