په کابل کې د هراتي زندانیانو کورنیو د يو اعتراض په ډول د افغان حکومت څخه غوښتنه وکړه، چې د بګرام او څرخي پله په زندانونو کې هراتي بنديان هرات ولایت ته ولېږدوي.
د دغو کورنيو شمېر، چې شاوخوا ۲۰۰ تنو ته رسېده د " موږ د خپلو زندانیانو د تبدیلي غوښتونکي یو." شعار يې ورکاوه او د هرات ولایت مقام مخې ته د اعتراض په ډول سره را ټول شوي وو.
د زندانیانو کورنۍ وايي، کلونه کيږي، چې د اقتصادي ستونزو له وجې د خپلو بنديانو پوښتنې نه شي کولی.
د دغو زندانیانو له ډلې ځينو کورنيو سلام وطندار ته وویل، داسې زندانیان هم شته، چې په هرات کې يواځې د غلا په تور څرخي پله زندان ته لېږدول شوي او د څلورو کلونو په تېرېدو سره اوس هم په زندان کې شپې او ورځې سبا کوي.
۵۲ کلنه پري ګل د کابل په څرخي پله زندان کې د یو تن زنداني مور وايي، چې زوی يې څلور کاله وړاندې د پسه د غلا په تور نیول شوی او تر اوسه په زندان کې پروت دی.
نوموړې زیاته کړه، چې د همغه وخت وروسته د کور ټول اقتصادي بار د هغې پر غاړه ده او نور نه شي کولی، چې د دغه بوج له مسووليته ووځي.
اعتراض کوونکي پر حکومت تور لګوي، چې د هراتي زندانيانو حقوق ته سمه رسېدنه نه کوي.
له بل لوري د هرات د والي ویاند احسان الله حیات وايي، چې د هرات د زندانیانو د کورنۍ غوښتنې د هرات سیمه ییزې ادارې پورې هيڅ تړاو نه لري.
حیات وايي، چې د زندانیانو د لېږد په اړه باید په پلازمېنه کې تصميم ونيول شي.
همدارنګه د هرات د مرکزي زندان مدير عبدالله عزیزي سلام وطندار ته وویل، هغه زندانیان چې په لویو او سنګينو جرایمو لاس پورې کړي باید د قانون پر بنسټ داسې زندانونو ته واستول شي، چې د هر ډول امنیت څخه برخمن وي.
د نوموړي خبره د هرات له زندان څخه د زندانیانو لېږدل د ولسمشر د فرمان او امنیت شورا پر بنسټ شوی.
دا په داسې حال کې ده، چې له دې وړاندې د هرات په زندانونو، عدلي او قضايي ارګانونو کې د فساد شتون له امله د زندانیانو کورنيو هم د اعتراض په ډول سرکونو ته راوتي وو.
