د عدليې وزارت چارواکي وايي، چې د ولسمشر د تقنیني فرمان او د ټاکنیزو اصلاحاتو کمېسیون د وړاندیز پر بنسټ د ټاکنو په قوانینو او د ټاکنیزو واکونو د جوړښت په قانون کې تعدیلات راغلي دي.
د عدلیې وزارت اداري مرستیال سید محمد هاشمي وايي، چې د سنبلې په ۱۴مه نېټه په وزیرانو شورا کې دغه قانون تصویب او د وږي میاشتې په ۱۵مه، پر ټاکنیزو قوانینو کې تعدیلونه؛ د ولسمشر له خوا توشېح او نافذ شول.
نوموړي وویل، د دغه قوانینو پر بنسټ د ټاکنیزو کمېسیونونو د کمېشنرانو د ټاکنې کمېټه باید جوړه شي.
له بل لوري اجرایه ریاست وايي، چې د نویو کمېشنرانو د غوراوي کمېټې د غړیو د پېژندلو له پاره کار روان دی او د ولسي جرګې د ټاکنو مهالوېش به د ټاکنیزو کمېسیونونو نوي کمېشنران اعلان کړي.
همدا ډول د عدلیې وزارت مرستیال وايي، چې په ټاکنیزو قوانینو کې د تعدیلونو له مخې به د ټاکنې کمېټه رامنځته او د دغه کمېسیون له رامنځته کولو سره به د ټاکنو د کمېسیون کمېشنران او د ټاکنیزو شکایتونو کمېسیون وټاکل شي.
په داسې حال کې چې د ټاکنو د خپلواک کمېسیون کمېشنران وايي تر راتلونکو څلورو کلونو خپل کار ته دوام ورکوي.
ولسمشر په تقنیني فرمان کې د ټاکنیزو اصلاحاتو د کمېسیون د وړاندیزونو له تاییدولو سره عدلیې وزارت او د چارو ادارې لوی ریاست ته امر کړی، چې د ټاکنیزو اصلاحاتو د کمېسیون د اوو وړاندیزونو د پلي کولو له پاره د قانوني زمینو د برابرولو له پاره پرته له ځنډه لاس په کار شي.
