دغه مطلب نن د (جولای په ۲۳مه) د افغانستان خلاصون شورا په کابل کې له بېلابېلو ولایتونو نه د راټولو شویو قومي مشرانو او دیني عالمانو په ګډون یوه جوړه شوې غونډه کې څرګند کړ.
د شورا غړو ټینګار وکړ، چې د سولې خبرو اترو کې ولس کولای شي، چې د دواړو لورو ترمنځ ضمانت وکړي او پر ناړامه او ناراسته لوري فشار راوړي.
د افغانستان خلاصون شورا په دې اړه یو پریکړه لیک هم صادر کړ، چې د شورا غړي عبدالله صديقي ولوست.
د دغه پرېکړه لیک په یوه برخه کې یې راغلي دي: "افغان ولس د دې واک لري چې د افغانستان د جوړښت د خبرو اترو اصولو سره په ټکر کې د هر اړخ نامتناسبو او بې ځایه غوښتنو او شرطونو رد او د هېواد د اسلامي او ملي ګټو په رڼا کې ناغېړي کوونکو ته قناعت ورکړي.
د افغان ولس پر محور او منځګړیتوب سره د افغانستان د جوړښت خبرې اترې د ګاونډيانو او نور مغرضو اړخونو له اغېزې څخه په خوندي چاپېریال کې ترسره کیدای شي."
دغه راز، د چنګاښ په ۱۵ مه د پاکستان په مري ښار کې د افغان حکومت او طالب استازو ترمنځ مخامخ رسمي خبرې و شوې او دواړه لوري پر دې سلا شول چې په راتلونکې دویمه رسمي غونډه کې به یو بل ته د خپلو غوښتنو لیست وړاندې کوي.
د سیاسي چارو شنونکی ابوبکر متقي وایي، دا لا نه ده مالومه، چې د سولې په برخه کې به دواړه لوري په کومو شرطونو اوغوښتنو خبرې پیلوي.
ښاغلی متقي زیاتوي، چې طالبان تر ډېره د اساسي قانون په تغیر ټينګار کوي، چې حکومت د دې شرط پلوی نه دی، لکه نوی حکومت نه غواړي، چې د ښځو حقوق، بشري حقونه، له بهرنیانو سره امنیتي تړون او خپلې نورې ۱۳ کلنې لاسته راوړنې له لاسه ورکړي.
دغه راز، نن په کندهار کې هم د سولې په ملاتړ جوړې شوې غونډه کې سلاکار وزیر حاجي اغالالي پر قومي مشرانو، عام ولس او د یني عالمانو غږ وکړ، چې د سولې بهیر ګړندیتوب لپاره یو بل ته لاسونه ورکړي.
د ده په وینا، سویل لویدیځه حوزه جګړې سخته ځپلې ده او موږ تر بل هر چا ډېر سولی ته تږي یو.
ها خوا د چهارشنبې ورځ د امریکا ولسمشر بارک اوباما له افغان ولسمشر محمد اشرف غني او اجرایوي رییس عبدالله عبدالله سره د ويډیويي کنفرانس له لارې خبرې وکړې.
اوباما په دغه ویډيويي کنفرانس کې د افغانانو په مشرۍ د افغان سولې د بهیر ملاتړ وکړ.
سپينې ماڼۍ د اعلامیې په خپرولو سره ویلي، چې په دې خبرو کې اوباما د سولې په اړه د ولسمشر اشرف غني هڅې ستایلې دي.
د امریکا ولسمشر داسې مهال له افغان سولې خپل ملاتړ اعلانوي، چې تمه ده د افغان حکومت او طالبانو تر منځ دویم پړاو خبرې اترې په نېږدې وخت کې په چین کې ترسره شي.
