د اروزګان ولایتي چارواکي وايي، چې په خاص اروزګان ولسوالۍ کې له دوو ورځو راهیسې د سیمه ییزو پولیسو او طالبانو ترمنځ سخته نښته روانه ده.
د خاص اروزګان ولسوال عبدلکریم کریمي سلام وطندار ته د ټیلیفون پر کرښه وویل، چې د دې ولسوالۍ د سلطان محمدناوې په سیمه کې د سیمه ییزو پولیسو او طالبانو ترمنځ په جګړه کې د سیمه ییزو پولیسو ۳ پوستې د طالبانو لاسته ورغلې دي.
د کریمي په خبره، د طالبانو له خوا په نیول شویو امنیتي پوستو کې د سیمه ییزو پولیسو ۲۶ عرادې موټرسایکلونه هم د طالبانو ولکې ته لوېدلي دي.
ولسوال وايي، چې تر دې مهال په جګړه کې ۴ تنه طالبان وژل شوي او ۳ تنه نور یې ټپیان شوي دي.
نوموړې د افغان امنیتي ځواکونو د مرګ ژوبلې په اړه وویل، چې په نښه کې تر دې مهال ۲ تنه پولیس وژل شوي او ۳ نور ټپیان شوي دي.
د خاص اروزګان د سلطان محمدناوې د سیمه ییزو پولیسو قومندان ملاعبدالصمد د نښتې له سیمې سلام وطندار ته په ټیلیفوني کرښه وویل، چې تر دې دمه په جګړه کې ۴ تنه طالبان وژل شوي دي او ۵ تنه یې ټپیان دي. هغه زیاته کړه، چې په جګړه کې ۲ میله وسله هم د پولیسو لاسته ورغلې دي.
ملاعبدالصمد وايي، چې په جګړه کې د ۲ تنه وژل شویو پولیسو وسله طالبانو ته په لاس ورغلې ده.
دی وايي، چې جګړه لاهم روانه ده او تر اوسه پورې د جګړې سیمې ته مرستندویه ځواکونه نه دي ورغلي.
په ورته وخت کې د طالبانو ویاند قاری یوسف احمدي رسنیو ته په استول شوي ټیلیفوني پیغام کې لیکلي دي، چې د خاص اروزګان ولسوالۍ په نښته کې یې د سیمه ییزو پولیسو د ۲ قومندانانو په ګډون ګڼ شمېر سیمه ییز پولیس وژلي دي.
خو د یادې ولسوالۍ امنیتي مسولین بیا دغه ادعا رده وي.
