اوتمیش 24 ساعت‌ده اولکه امنیتی کوچلری 9 ولایت‌ده آلدیندن ریجه‌لنگن عملیاتلرنی اویویشتیرگن.
شنبه کون ملی مدافعه وزیرلیگ سوزلاوچیسی‌نینگ اورین باسری دولت وزیری‌نینگ اوتکزیلگن ییغینده ایتیشیچه، 203 تندر قول اردوسی پکتیانینگ سمکنی‌ده، غزنی‌نینگ قره باغ و اندری‌ده، خوست‌نینگ موسی‌خیل و صبری‌سیده و میدان‌وردک‌نینگ جلریزی‌ده عملیات اویویشتیرگن. وزیری‌گه کوره، مذکور عملیاتلر نتیجه‌سیده 46 جنگری طالب هلاک و باشقه 38 ته‌سی هم یره‌لنتیریلگن.
جناب وزیری‌نینگ ایتیشیچه، 215 میوند، 203 اتل، 209 شاهین و 207 ظفر قول اردولری اولکه ایریم منطقه‌لریده یوتوقلی عملیاتلر اویویشتیرگنلر.
او، اولکه هوایی کوچلر اوچقیچی هم اوتمیش 24 ساعت‌ده 70 مرته اوچگن‌لیگی‌نی بیلدیره‌دی و مذکور اوچیشلر ترانسپورتی و حربی بولگنلیگینی تیلگه آلگن.
جناب وزیری‌نینگ کوپه‌یتیریشیچه، مذکور عملیاتلرده 73 طالب هلاک، 80 طالب یره‌لنگن و باشقه 5 ته‌سی هم امنیتی کوچلر قولیگه توشگن. شونینگ‌دیک مذکور عملیاتلرده امنیتی کوچلردن 6 ته‌سی هلاک بولگن‌لیگی ایتیله‌دی.
اما بوگون کوپلب کینگش نماینده‌لری امنیتی وضعیت یامان بولیشی و اوروش محله‌سیده اوق اسلحه جهازلری یاردمی ییتکیزیلمه‌گن‌لیگی‌نی تنقیدلیدیلر.
کینگش عضوی اسدالله سعادتی، امنیتی کوچلر اکمالاتی وضعیتی قانیقتیررلی ایمس‌لیگی‌گه اشاره قیلیب ایتیشیچه، اولکه ایریم منطقه‌سیده حربی کوچلر طالب‌لرگه قرشی کوره‌شیش اوچون جان بیره‌دیلر، ولی حکومت اولرگه توجه قیلمیدی.
کینگش ینه بیر اعضاسی شکریه پیکان هم کندوز امنیتی وضعیتی‌دن خواطر بیلدیره‌دی. خانم پیکان کندوز امنیتی وضعیتی توغری‌سیده مسؤوللرنی توجه سیزلیک‌گه قاره‌لیدی.
فراه و فاریاب ولایت‌لریده ملی اردونینگ عملیاتی‌ده جنگری‌لرنینگ 40 نفری اولدیریلگن
فراه ولایتی‌ده ملی اردونینگ سوزلاووچیسی حنیف‌رضایی‌نینگ سلام‌وطندارگه ایتیشیچه، مذکور ولایت‌نینگ گلستان ولسواللیگیده بوندن اوچ کون آلدین یولگه قوییلگن حربی عملیات اوز پایانیگه ییتگن. اونگه کوره، مذکور عملیاتده 17 طالب اولدیریلگن وباشقه 13 جنگری یره‌لنگن.
رضایی‌گه کوره، اوروشده بیر قنچه قورال اسلحه هم ملی کوچلر تامانیدن قولگه کیریتیلگن. شونینگ‌دیک فراه‌ده ملی اردو سوزلاووچیسی، ملی کوچلری و تینچ اهالیگه تلفات ییتمه‌گن‌لیگینی ایتگن.
بو توغریده هنوزگچه طالب‌لر بیرار نرسه دیمه‌گن.
شاهین 209- قول اوردوسی‌نینگ سوزلاووچیسی محمدرضا رضایی‌نینگ سلام‌وطندارگه بیلدیریشیچه، عملیات فاریاب‌نینگ المار ولسواللیگیده اوتگزیلگن. ایتلیشیچه، عملیاتده جنگری‌لرنینگ 14 نفری اولگن. رضایی، هلاک بولگن‌لرنینگ 6 نفری اوزبیکستان و پاکستان فقراسی بولگنلیگینی اورغولیدی. اونینگ سوزلریگه کوره، مذکور ولسوال‌لیک‌که یوزلب طالب هجوم قیلگن بیرچاغده بونده‌ی ییریک عملیات اوتکزیلگن.
جناب رضایی، اوروش نتیجه‌سیده جنگریلر المار ولسواللیگی‌نینگ «دلبک» قیشلاغیدن چیقاریلگنلر. شونینگ‌دیک جنگریلرگه قره‌شلی 30 دن کوپراق موترسایکل و قورال اسحله ملی کوچلر تامانیدن قولگه کیریتیلگن.
ملی اردونینگ فاریاب ده‌گی سوزلاووچیسی اوروشده تینچ اهالیگه زیان ییتمه گن‌لیگینی ایتگن.
