د عامې روغتيا وزارت چارواکي وايي، چې دوی جدي هڅې کوي، څو د راتلونکي ۲۰۱۸ م زيږدیز کال تر پایه پورې د ګوزڼ له ناروغۍ څخه افغانستان پاک کړي.
د یاد وزارت وزیر ډاکټر فیروز الدین فیروز نن دوشنبه (۲۰۱۵ زيږدیز/ جون ۸) کابل کې یوې خبرې غونډې ته وویل، هڅې یې ګړندۍ کړي، چې سږکال تر پایه په افغانستان کې د ماشومانو د ګوزڼ (پولیو) ناروغۍ ودروي.
فیروز ژمنه وکړه، چې سږکال په ټول افغانستان کې درې پېښې د ماشومانو د ګوزڼ ناروغۍ رامنځته شوې چې دوه په فراه او یوه په هلمند کې وه.
د افغانستان په ګډون نایجریا او پاکستان هغه هېوادونه دي، چې د ماشومانو ګوزڼ ناروغۍ پېښې په کې زیاتې لیدل کیږي.
ډاکټر فیروز وایې، دوی د پاکستاني چارواکو سره خبرې کړي، چې پر ډ يورنډ کرښه ګرځنده روغتیايي مرکزونه جوړ او هغه کډوال چې افغانستان ته راځي ماشومان یې باید له راتګ وړاندې واکسین شي.
د هغه په خبره تر ۲۰۱۸ م زېږدیز کاله پورې د ګوزڼ ناروغۍ د له منځه وړلو له پاره کافي امکانات هم په واک کې لري.
همدارنګه د عامې روغتیا وزیر د خپلو درې میاشتنيو کړنو یادونه هم وکړه، چې په کلیوالي سیمو کې د روغتیايي خدمتونو د پوښښ کچې زیاتوالی، د خوړو او درملو کیفیت ښه کېدو ځينې کارونه کړي دي.
ډاکټر فیروز وایې، هر کال افغانستان ته د ۴۰۰ میلیونه ډالرو په ارزښت درمل راوړل کیږي، چې زیات شمېر یې بې کیفیته او یاهم قاچاقي دي.
نوموړی زیاتوي، ۱۴۵ د درملو کمپنیو جواز یې لغوه کړې، چې ۲۵ یې بهرنۍ وې.
ډاکټر فیروز الدین زیری ورکړ، چې په راتلونکې کې به د درملو یو ملي شرکت جوړ کړي چې ټول خلک ترې باکیفیته او په ټيټه بیه درمل ترلاسه کړي.
