.jpg)
د افغانستان د ملکي خدمتونو د ریاست مسوولین وايي، چې په دولتي پوستونو کې د اشخاصو د نه ګومارنې یو اصلي لامل د لوړ پوړو مقاماتو له لوري د پرلپسې احکامو لېږل دي.
د یادې ادارې رییس احمد مسعود توخي وویل، چې هر لوړ پوړی مقام غواړي خپل نږدې کسان او خپلوان و ګوماري او دا چاره د اشخاصو د مقررېدو پر مخ په لوی خنډ بدل شوی دی.
توخي زیاته کړه، چې په دولتي ادارو کې د زیات قاغذ پرانۍ له وجې د دولتي کارکوونکو جذبېدلو پروسه اوږده کړې او دولت باید د دغې پروسې د لنډولو له پاره فوري اقدامات ترسره کړي.
نوموړی چې د ولسي جرګې استجوابیه غونډې ته بلل شوی و زیاته کړه، همدا اوس له ۲۵ زرو زیات دولتي بستونه خالي دي.
له بل لوري د ولسي جرګې ځينو غړو هم ادعا وکړه، چې اوسمهال د افغانستان په دولتي ادارو کې ۵۰ زره دولتي بستونه خالي دي او دولت هم د دغو بستونو د ډکولو له پاره ځانګړې ستراتيژي نه لري.
اخوا د کار او ټولنیزو چارو وزیره نسرین اوریاخېل وویل، چې د خالي بستونو ذکر شوی شمېر د افغانستان د ولسمشرۍ ماڼۍ او ملکي خدمتونو د کتبي راپور سره سمون خوري.
.jpg)
احمد مسعود همدارنګه زیاته کړه، چې ۲۵۵۸۴ دولتي پوستونه خالي دي، چې زیات يې د افغانستان ښوونې او روزنې او پوهنې وزارتونو پورې اړه لري.
د راپورونو پر بنسټ همدا اوس یوازې ۱۳ زره خالي بستونه یوازې په دغو دوو ذکر شویو وزارتونو کې موجود دي.
اوریاخېل زیاته کړه، چې په ټوله کې د افغانستان په اداري نظام کې ۸۴۹ زره په ملکي او نظامي برخو کې بستونه وجود لري، خو په نظامي برخو کې د خالي بستونو په باب راپور په واک کې نه لري.
د کار او ټولنیزو چارو وزیره وویل، چې دوی یوه راډيويي خپرونه جوړه کړې، چې د هغه له مخې به په کال کې ۷۵ زره تنه به بېلابېلو ادارو ته معرفي شي.
هغې زیاته کړه، چې له دې وروسته که هرچا ۶ میاشتې په دولتي اداره کې کار وکړ، نو یو کال د کاري تجربې سند به ورکول کيږي.
سره له دې، چې د کار او ټولنیزو چارو وزارت او ملکي خدمتونو د چارواکو له لوري وړاندې شوې شمېرې د زیاتو وکیلانو له پاره د تصدیق وړ وې، خو ځينو نور بیا دغه ارایه شوې شمېرې ناقص او د قانون خلاف دي.
