د بغلان نهرین ولسوالۍ څنګ کې د جلګې ولسوالۍ له رامنځته کېدو ۲۴ کاله تېرېږي؛ خو دغه ولسوالۍ لا هم بازار نهلري.
وايي، د جلګې اوسېدونکیو او ولسوال ترمنځ د اختلافونو او ننګونو له امله دې ولسوالۍ کې بازار نه جوړېږي.
سره لهدې چې د طالبانو رژیم له نړېدلو وروسته او د لنډمهاله حکومت له پیل راهیسې بغلان کې میلیونونه ډالره لګول شوي؛ خو د رغولو او بیارغولو له چارو نیولې، د امنیت، برېښنا او اوبو تر تامین پورې، هېڅ مورد په جلګې ولسوالۍ کې نهدی پلي شوی.
د جلګې اوسېدونکي محمدالدین او برهانالدین د خلکو او ولسوال ترمنځ اختلاف، دغې ولسوالۍ کې د موجودې ستونزې اصلي لامل بولي.
د دوی په وینا، د هټیو او بازار د نهشتوالي ترڅنګ دا ولسوالي منظم سړک هم نهلري. د دوی په وینا، ناروغ مخکې لهدې چې روغتون ته ورسېږي؛ د لارې د خرابوالي له امله په لاره ساه ورکوي.
دوی په یو هټي د پيدا کېدو او په هغه کې د سودا له نروخونو هم شکایت کوي.
فضلمنالله د جلګې یوازینی هټیوال دی چې په هټي کې یې ډېر کم څه پیدا کېږي.
کوم څه چې د فضلمنالله هټي کې پلورل کېږي؛ د بازار له بیې دوه درې برابره لوړه بیه لري.
دی وايي، سره لهدې چې دوه کاله مخکې یې هټی جوړ کړی؛ خو تراوسه پورې ولسوالۍ کې د ولسوال په نوم څوک نه پېژني.
د جلګې ولسوالۍ اوسېدونکي له ډېرو لوړو او ژورو سره مخ شويدي.
د ولسوالۍ یوه څنډه کې د غیرمسولو وسلهوالو د زور ـ زیاتي له کبله یو معیوب شکایت کوي.
دا کس چې نور محمد نومیږي وايي، وسلهوالو کسانو یې کور ته اور واچولو او هېڅ بنسټ نهشته چې د ده حق ورته ورکړي.
له ډېرو هڅو سره ـ سره د دې ولسوالۍ د اوسېدونکیو ادعاوو په اړه مو د جلګې ولسوال نظر وانهاخیستلی شو.
د بغلان والي عبدالحی نعمتي چې څو مودې وړاندې دې ولسوالۍ ته تللی، د یادو ستونزو منلو ترڅنګ وايي، یو کمېسیون یې ټاکلی چې د جلګې ولسوالۍ امنیتي ستونزو ته پر رسېدو سربېره د جلګې بازار ته د موقعیت ټاکلو پر سر اختلافونه هم حل کړي.
دی د ولسوالۍ اوسېدونکي پړه ګڼي او وايي، له بدهمرغه خپله د ولسوالۍ اوسېدونکي د بازار لهپاره د سیمې ټاکلو پر سر هوکړې ته نهدي رسېدلي او اوس غواړي هغه سیمه چې له مرکز نه لېږلي پلاوي د بازار لهپاره غوره کړي ومني.
د بغلان جلګه ولسوالۍ د څه باندې ۴۰زره نفوس په لرلو پُلخمري ښار نه ۱۰۰ کیلومتره واټن لري چې ژمي او پسرلي کې د واورې ورېدلو او د سېلابونو د راوتلو له کبله د دې ولسوالۍ خام عمومي سړکونه د ټرافیکو پر مخ تړلي وي.
