۱۳۹۴ کال د ښځو له پاره له تاوتریخوالي ډک کال و

د افغان ښځو شبکې مشرې حسینې صافۍ نن یکشنبه (فبروري ۱۴مه) په کابل کې د ښځو پر وړاندې تاوتریخوالي ضد یو بیلیوني نړیوال پاڅون په مناسبت د ( فرخندې له پاره عدالت د ټولو له پاره عدالت دی) تر نوم لاندې غونډې ته وویل، چې په تیرو ۱۴ کلونو کې ۱۳۹۴ م ز کال د امنیت او تاوتریخوالي له پلوه د ښځو له پاره له زورزیاتیو ډک کال و.

صافۍ زیاته کړه، د ښځو پر وړاندې د تاوتریخوالي ضد یو بیلیوني پاڅون غونډه يي هم سږ کال د فرخندې پیښي ته ځانګړي کړي وه او د فرخندې د عدالت غوښتنې بهیر د دوی له پاره د قناعت وړ نه دی.

دغه راز د ښځو چارو وزیرې د لبر نظري هم د فرخندې له پاره د عدالت غوښتنه د هغې د پلویانو له پاره د قناعت وړ نه بولي او وايي، چې له څیړنو وروسته د دغې پيښي علت تر اوسه پورې نه دی په ډاګه شوی.

د افغان ښځو شبکې یو پریکړه لیک هم صادر کړ، چې په کې راغلي د ملي یووالي حکومت مشران په جدي حالاتو کې د بیانیو نشرول د پېښو مخنیوي ته بسنه نه کوي او داسې ژمنې، چې برخلیک يې له هیریدو نه پرته نورڅه نه دي.

د افغان ښځو شبکې په صادر کړي پریکړه لیک کې یو شمیر غوښتنې هم درلودلې، چې د فرخندې او د تاوتریخوالي نورو قضیو ته په جدي او قانوني توګه رسیدنه کول، عدالت ته د ښځو لاسرسی، د ښځو تاوتریخوالو قضیو څیړلو له پاره  د درې ګونو قواو تر څنګ یو مشخص میکانیزم رامنځته کول، د ښځو د تاوتریخوالي څیړلو ځانګري محکمې غوښتنه او د تاوتریخوالي عاملین محکمه کول او نور په کې شامل وې.