افغانستان بوییچه بیرلشگن ملتلر تشکیلاتی نینگ اورین باسرلیک هیأتی یا-ده یوناما نینگ اعلان قیلیشیچه، اوشبو نهاد تامانیدن صورت تاپگن تیکشیریشلرگه کوره، هلمند ولایتی نینگ سنگین تومنیده حربی کوچلرنینگ طالبانگه قرشی هجومی تینچ اهالی نینگ تلفات کوریشیگه سبب بولگن.
اوتگن "سهشنبه" کونی یوناما نینگ توییتر صحیفهسیده یازیشیچه، بیرقطار اعتبارلی منبعلرنینگ اولرگه ایتیشیچه، ملی اردو کوچلری طالبان هجومیگه قرشی نیچه راکت اوقی آتگن، بیراق نتیجهده تینچ اهالی قربان بولگن.
اوتگن "دوشنبه" کونی هلمند ولایتی نینگ سنگین تومنیده بیر موترگه جایلشتیریلگن ماین نینگ پارتلشی و راکتی هجوم عاقبتیده، بیرقطار تینچ اهالی هلاک و یرهلنگن ایدی.
اوشبو واقعهدن سونگ، هلمند حاکمی بیر خبرنامه آرقهلی، طالبان تامانیدن آتیلگن راکت اوقی و بیر موترگه جایلشتیرلگن ماین نینگ پارتلهشی عاقبتیده، 23 تینچ اهالی هلاک و باشقه 15 تینچ اهالی یرهلنگنیدن خبر بیرگن ایدی.
طالبان گروهی، ملی اردو کوچلرینی اوشبو هجومگه مسوول عنوان قیلگن، بیراق هلمند حاکمی مذکور خبرنامه آرقهلی، راکت اوقلرینی دولتی کوچلر تامانیدن آتیلگنینی رد قیلگن.
یوناما اوروش طرفلریدن جمعیتلی بولیملرده اوروشنی توختهتیشلرینی سورهگن.
اوشبو نهاد افغانستان دولتی دن مذکور واقعهنی تیکشیریش اوچون بیر هیات تعیین قیلیشینی سورهگن.
