آسیا یورهگی منطقوی ییغینی 8 – دسمبر کونی پاکستان پایتختی اسلامآباد ده ایش باشلهدی. ایکی کون دوام ایتهدیگن اوشبو ییغینده اساساً ترورچیلیککه قرشی کورهش، افغانستانده تینچلیک اورنهتیش، رسمی کابل بیلن جنگری طالبلر ارا تینچلیک مذاکرهلرینی قیته باشلش کبی مهم مسالهلر اوستیده بحث ایتیلهدی. اسلامآباد رسمیلری اوچون اوشبو ییغین کمیده بیر ییلدن بیری افغانستان بیلن جوده قویی سطحده پسهیگن مناسبتلرینی قیته تیکلش، همده هندوستان بیلن اوز علاقهلرینی یخشیلش اوچون کته اهمیتگه ایگه مساله سنلهدی.
هندوستان نینگ تشقی ایشلر وزیری خانم سوشما سواراج نینگ اسلامآباد ده اوتکزیلهدیگن آسیا یورهگی ییغینیده قتنهشیشی سیاسی جهتدن پاکستان دولتی اوچون یوتوق سنلهدی. عین حالده جمهور رییس اشرف غنی نینگ بیر ییللیک ساووق مناسبتلردن سونگ اسلامآبادگه باریشی پاکستان بلند مرتبهلی رسمیلرینی خرسند قیلگن بولیشی طبیعی بیر حال البته.
افغانستان ملی بیرلیک حکومتی ایش باشلهگنیده جمهور رییس غنی قوشنی پاکستان بیلن کوتیلمهگن درجهده یقینلهشیب پاکستان همکارلیگینی افغانستانده برقرارلیک اورنهتیش مسالهسیگه جلب ایتماقچی بولگن ایدی. رسمی کابل نمایندهلری بیلن طالبلر وکیللری اورتهسیده اسلامآباد ده اوتکزیلگن باشلنغیچ مذاکرهلر اشرف غنی حکومتینی پاکستان یاردمیده مملکتده صلح کیلتیریشلیککه قیزیقتیرگن ایدی. توستدن طالبلرنینگ سابق رهبری ملا محمدعمر وفاتینینگ خبری ترقهلیشی، عین حالده کابل همده افغانستاننینگ شمال ولایتلریده طالبان نینگ اوزلوکسیز هجوملری اینیقسه قندوز شهرینی وقتینچهلیک جنگریلر قولیگه اوتیشی کابل حکومتینی پاکستانگه نسبتن بدگمان قیلگن ایدی.
رسمی کابل – اسلامآبادنی افغانستانده برقرارلیک تامین ایتیلیشی بارهسیده صادق ایمسلیگینی بیلدیریب، پاکستاننی ترورچیلردن حمایت ایتیب کیله یاتگنلیککه متهم قیله باشلهگن ایدی. اسلامآباد رسمیلری یقینده ایریم ییریک دولتلر جملهدن امریکا و چین باسیملری نتیجهسیده افغانستان و هندوستان بیلن اوز مناسبتلرینی یخشیلهشگه اورینه باشلهگن ایدیلر.
یقینده فرانسه پایتختی پاریسده تشکیل ایتیلگن اقلیم اوزگریشی خلق ارا ییغینی آلدیندن پاکستان نینگ پشتون قوملری نینگ سیاسی باشلیغلری کابلگه سفر قیلیب اشرف غنیدن پاریسده باش وزیری نوازشریف بیلن اوچرهشیشینی طلب قیلگن ایدیلر. نهایت فرانسه پایتختیده تامانلر ارا اوچرهشوو اوتکزیلدی.
در واقع اوشبو ملاقات اشرف غنینینگ اسلامآباد ده اوتکزیلهدیگن آسیا یورهگی نامیدهگی ییغینیده قتنهشیشی اوچون یول آچیب بیرگن ایدی. باشقه بیر تاماندن مذکور ییغین نینگ باش موضوعسی افغانستانده برقرارلیک اورنهتیش مسالهسیگه قرهتیلگن.
اوشبو ییغیننی افغانستان رهبری محمداشرف غنی و پاکستان باش وزیری نواز یریفلر باشقرهدی. پاکستان دولتی آسیا یورهگی نینگ اسلامآباد ده تشکیل ایتیلگن منطقوی ییغینیده ترورچیلیککه قرشی کورهشنی جدللشتیریش اوچون دنیا دولتلری همکارلیگی و حمایتینی جلب ایتیش یونهلیشیده مهم مؤفقیتلرگه ایریشیلیشیگه کته امید باغلهگن.
اصلیده آسیا یورهگی نینگ اسلامآباد ییغینی افغانستان اوچون هم کته اهمت کسب ایتهدی. افغانستان نینگ اسلامآبادگه سفر قیلگن هیئتینی اوشبو ییغیندن مملکتده برقرارلیکنی اورنهتیش بوییچه یخشی فایدهلنیشلری درکار.
در حقیقت افغانستان دیپلوماسیسی اوچون مذکور ییغین اوته قولی بیر فرصت سنلهدی. افغانستان ملی مجلسی اعضالری هم آسیا یورهگی ییغینینی افغانستان اوچون مهم بولگنینی تاکیدلب، مملکت رهبرلریدن مذکور ییغینده فعال قتنهشیشلرینی سورهگن ایدیلر.
جمهور رییس محمداشرف غنی دوشنبه کونی پایتخت کابلده خبرچیلر بیلن اوتکزگن ملاقاتیده اوشبو ییغینده اشتراک ایتیشینی بیلدیریب، دنیا دولتلری نمایندهلری همده قوشنی مملکت پاکستان رسمیلری بیلن ترورچیلیککه قرشی کورهش همده افغانستانده برقرارلیک اورنهتیش، قالهویرسه طالبلر بیلن رسمی کابل مذاکرهلرینی قیته باشلهنیشی بارهسیده به تفصیل بحث ایتیشینی بیلدیرگن ایدی.
اسلامآباد ده اوتکزیلهدیگن آسیا یورهگی نینگ بیشینچی ییغینیده دنیا نینگ 44 دولتی وکیللری اشتراک ایتیشی کوتیلهدی. افغانستان همده منطقه و دنیا دولتلری آسیا یورهگی ییغینیدن ترورچیلیککه قرشی کورهش بارهسیده مهم نتیجهلر کوتماقدهلر.
چون که بیر نیچه ییلدن بیری جنوبی آسیا اینیقسه افغانستان و پاکستان ترورچیلر فعالیتی نینگ مهم مرکزلریدن بیریگه ایلنگن. حاضرگی کونده پاریس و امریکا نینگ کالیفورنیا ایالتیده یوز بیرگن ترور هجوملریدن سونگ اینیقسه داعش نینگ دنیا بویلب ترور هجوملریگه فعال قتنشه یاتگنی دنیا جماعه چیلیگی آلدیده ترورچیلرگه قرشی کورهش مسالهسینی بیرینچی اساسی دالضرب مساله گه ایلنتیرگن. منطقه دولتلری جملهدن پاکستاننی بو آرهده جدی مسؤولیت حس قیلیشی کوتیلهدی.
آسیا یورهگی کبی منطقوی ییغینی اصلیده آسیا دولتلری ارا اقتصادی همکارلیکلرنی رواجلنتیریش مقصدیده تاسیس ایتیلگنیگه قرهمی سیاسی مسالهلر خصوصاً ترورچیلیککه قرشی کورهش اوشبو منطقوی تشکیلات اوچون هم مهم بولیب قالدی.
چونکه کیینگی آیلرده ترورچیلیک دنیا بویلب مثلی کوریلمهگن درجهده تهدید منبعیگه ایلنگن. حاضرگی کونده منطقه دولتلری اینیقسه ترورچیلیک نینگ اساسی قربانلریگه ایلنگن افغانستان خلقی اسلامآباد ده اویوشتیریلگن آسیا یورهگیدن ترورچیلرگه قرشی ایاوسیز کورهش آلیب باریش اوچون ایجابی و عملی قرارلر قبول ایتیلیشینی کوتماقدهلر.
