په افغانستان کې د ملګرو ملتونو دفتر (یوناما) په یوه تازه راپور کې وايي چې په افغانستان کې د فساد پروړاندې مبارزې د ډېر شمېر افغانانو پر ژوند اغېز نهدی کړی. د نوموړي په وینا، په افغانستان کې د فساد پروړاندې د مبارزې تګلارې د پرمختګ دوام، تلپاتې تمرکز او هڅو ته اړتیا لري.
د افغانستان لپاره د ملګرو ملتونو ځانګړي استازي تدامیچي یاماموتو په دغه راپور کې ویلي، «په افغانستان کې د فساد پروړاندې مبارزه اوس هم اساسي اړتیا ګڼل کېږي. ملګري ملتونه پهدې برخه کې د شویو پرمختګونو هرکلی کوي، خو د ژمنتیا، حسابورکونې او روڼتیا د اصولو په برخه کې باید ټول افغان بنسټونه د ټولنې له ټولو اړخونو سره خپلو هڅو ته دوام ورکړي.»
په دغه راپور کې چې «د فساد پروړاندې د افغانستان مبارزه: د سولې او ثبات لپاره بنسټیز کار» په نوم خپور شوی، هغه پرمختګونه تر څېړنې لاندې نیولي چې افغانستان د فساد پروړاندې د مبارزې لپاره اصلاحات رامنځته کړي دي. دغه راز یې د فساد پروړاندې د مبارزې په برخه کې د افغان بنسټونو د ملاتړ لپاره یې ځینې وړاندیزونه چې له مخې یې اړ دي چې هره ورځ له دې ګواښوونکې مسلې سره مخ شي، هم وړاندې کړي دي.
د ملګرو ملتونو ځانګړي استازي ویلي چې «فساد د قانون حاکمیت کمزوری کوي او نورو جنایتونو ته لار هواروي چې د هغې خبیثه کړۍ د جوړېدو لامل کېږي چې له سزا نه د معافېدو کلتور پیاوړی کوي.»
یاماموتو زیاته کړې، فساد ان د سولې پروسه هم له ګواښ سره مخ کوي؛ په داسې حال کې چې د افغانستان د راتلونکي لپاره د خبرو اترو حللاره باید پر رښتینولۍ او عدالت ولاړه وي.
په دغه راپور کې یاده شوې چې د فساد پروړاندې د مبارزې په برخه کې د اوسني دولت هڅو د ډېر شمېر افغانانو پر ژوند اغېز نهدی کړی او په حقوقي او د پالیسۍ په برخه کې له اصلاحاتو سره سره، فساد اوس هم تلپاتې سولې او ثبات ته د افغانستان د رسېدو پر لاره اساسي خنډ دی.
دغه بنسټ دغه راز وړاندیز کړی چې افغان حکومت باید اوسنیو لاستهراوړنو ته په کتو یوه اوږدمهالې تګلاره جوړه کړي او د فساد پروړاندې د مبارزې لپاره ملي اراده وکاروي.
تدامیچي یاماموتو په روان او تېرو کلونو کې د بنسټیزو اصلاحاتو لپاره د دولت هځې ستایلي او اړوندې ادارې یې نورو اصلاحاتو ته هڅولې دي.
نوموړی دغه راز راتلونکې ټاکنې هم له تېرو تجربو نه د ګټې اخېستنې په برخه کې یوه ازموینه بولي.
