اوتگن کیچه ساعت 10 اطرافیده بیر تراکتورگه جایلشتیریلگن ماین کابل شهری نینگ 9- حوزهسیگه تیگیشلی منطقهده جایلشگن «گرین ولیج» کمپیده پارتلهتیلگن. امنیتی مسووللرنینگ ایتیشیچه، بو واقعهده کوپ قطار تینچ اهالی هلاک ایتیلیب و یرهلنگن دیر.
طالبان گروهی بو هجوم مسولیتینی بوینیگه آلگن. اوشبو گروه سوزلاوچیسی ذبیحالله مجاهد نینگ توییتر صحیفهسیده یازیشیچه، بو هجوم چیتایللیکلرگه تیگیشلی بولگن «گرین ولیج» کمپیده صورت تاپگن.
گرین ولیج ایشلاوچیلریدن بیری نینگ کیملیگی سیرقالیشنی ایستهب ایتیشیچه، اوشبو کمپ بیر آیدن بویان امنیتی تهدید بیلن روپهره بولگن ایدی. منبع نینگ ایتیشیچه، امنیتی مسوولر تامانیدن بیریلگن گزارشلر اساسیده، پارتلاوچی ماده جایلشتیریلگن 3 موتر مذکور کمپ اوستیگه هجوم قیلیش اوچون قرار قیلگن ایکن.
پارتلاوچی ماده جایلشتیریلگن موترلردن بیری اوتگن کونی امنیتی مسووللر تامانیدن کشف ایتیلیب بیکار قیلینگن.
بیراق، امنیتی مسووللر باشقه ایکی موترنی کشف قیلیب و بیکار قیلیشگه موفق بولمهگن و نتیجهده مذکور موترلردن بیری اوتگن کیچه «گرین ولیج» کمپینی هجوم آستیگه قرار بیرگن.
منبع نینگ ایتیشیچه، کمپ دن 1 کیلومتر اوزاغده بولگن مسکونی ساحهلر مذکور پارتلشدن زیان کورگن و تینچ اهالی تلفاتی هم امنیتی مسووللر تامانیدن اعلان ایتیلگن ارقاملردن کوره کوپراغ دیر.
ایچکی ایشلر وزیرلیگی سوزلاوچیسی نینگ اعلان قیلیشیچه، بو واقعهده تینچ اهالی و کمپ ایشلاوچیلریدن 16 تهسی هلاک ایتیلیب و باشقه 119 کیشی یرهلنگن دیر. اوشبو پارتلش نتیجهسیده، بیر تیل تانگی کامل صورتده نابود ایتیلگن.
ایچکی ایشلر وزیرلیگی سوزلاوچیسیگه کوره، «گرین ولیج» ایشلاوچیلرینی هدف آستیگه قرار بیریش اوچون محلگه جایلشگن 5 طالب امنیتی کوچلر تامانیدن هلاک ایتیلگن.
ناتو تشکیلاتی نینگ باش کاتبی ینس استولتنبرگ و افغانستان بوییچه آمریکا ایلچیسی جان بس، اوتگن کیچه یوز بیرگن هجومنی قارهلشگن.
جناب استولتنبرگ اوز توییتر صحیفهسیده یازیشیچه، ناتو تشکیلاتی افغانستان خوفسیزلیک کوچلریدن حمایت قیلیشی گه دوام بیرهدی. او، آمریکا تشقی ایشلر وزیری مایک پمپئو بیلن اوچرهشگنده، گرین ولیج کمپی اوستیگه یوز بیرگن هجومنی قارهلگن.
شونینگدیک، افغانستان جمهورلیک ریاست سرایی بیر خبرنامه آرقهلی اوتگن کیچه یوز بیرگن هجومنی بشریت گه قرشی بیلیب و ایتیشیچه، طالبان گروهی امنیتی کوچلرنینگ برابریده اوروشه آلمهیدی و شو یوزهدن ترورچیلیک هجوملرگه قول اورهدی.
شوتوغریده…
