کوچني اختر ته ټینګ امنیتي تدبیرونه نیول شوي

د کورنیو چارو وزارت چارواکیو نن چهارشنبې یوې خبري غونډې ته وویل، چې کوچني اختر ته یې امنیتي پلان جوړ کړی، چې له مخې به یې د اختر په شپو ورځو کې ټینګ امنیتي تدابیر ونیسي.

د کورنیو چارو، روغتیا او اطلاعاتو فرهنګ وزارتونو ډاډ ورکړ، چې په خپل ټول توان هڅه کوي، چې د مخالفینو د ورانکاریو مخه ډب کړي.

غونډې ته د کورنیو چارو وزارت ویاند نجیب دانش وویل، چې د اختر په شپو ورځو کې په لویو ښارونو، مېله‌ځاینو او لویو لارو کې د امنیت ټینګښت ته لومړیتوب ورکوي.

دانش زیاته کړه، چې د ټولو ولایتونو پولیسو ته امر شوی، چې د اختر په شپو او ورځو کې په کلکه امینت ټینګ کړي او د کورنیو چارو وزارت ټولې کشفي دستګاوې قطعې د همدې ګډ پلان له‌مخې د هېوادوالو له‌پاره د خدمت جوګه دي.

دی خبرداری ورکوي، هېڅوک حق نه‌لري، چې د اختر په شپو او ورځو کې د خوښۍ هوایي ډزې وکړي، پر وینا یې، ټولو پولیسو ته یې امر کړی، که داسې کسان یې ونیول؛ د قانون منګولو ته دې وسپاري.

خبري غونډې ته د اطلاعاتو او فرهنګ وزارت د ځوانانو معین ډاکتر کمال سادت په‌خپلو خبرو کې پر کورنیو ټینګار وکړ، چې خپل ماشومان د پلاستیکي وسلو او پټاقیو پېرودلو ته پرې‌نه‌ږدي؛ ځکه چې له یوې خوا اقتصادي زیان لري او بله بلې‌خوا د ماشومانو په ذهنونو بده اغېزه کوي.

سادت له خلکو وغوښتل، چې د اختر په شپو او ورځو کې په مېله‌ځاینونو کې له انساني چلنده کار واخلي او د نورو د ځورونې لامل نه‌شي.

غونډې ته د روغتیا وزارت د روغتیایي خدمتونو وړاندې کوونکي معین فدامحمد پیکان وویل، چې د مرکز او ولایاتو ټولو روغتیایي مرکزونو ته یې ویلي، چې د اختر په شپو او ورځو کې خلکو ته اړین روغتیایي خدمتونه وړاندې کړي.

پیکان له موټر چلوونکیو وغوښتل، چې په کوچني اختر کې پوره پاملرنه وکړي، چې د ترافیکي پېښو کچه راټیټه شي.