د کونړ د وټهپور ولسوالي سلګونو اوسېدونکو نن سهار په دې ولسوالي کې د لاریون پر مهال د ولایتي ادارې پر هغې پرېکړې نیوکه وکړه چې له مخې یې د مناګي بند برښنا مرکز اسداباد او ماڼوګي ولسوالي ته ورکول کېږي.
لاریونوالو ویل چې دغه بند د دوی په سیمه کې جوړ شوی او د برښنا په وېش کې لومړی حق د دوی دی.
د وټهپور ولسوالي د ځوانانو ټولنې مشر او د لاریون سمبالګر رسولمحمد خاکسار وايي، د کونړ ولایتي ادارې د برښنا په وېش کې سلیقوي چلن کړی، د دوی له ولسوالي نه پورته او ښکته مرکز اسداباد ته یې لینونه غځولي، خو د دوی سیمه یې پرېښي ده.
دی وايي، د خپل حق د غوښتلو لپاره به هره دروزاه وټکوي.
د دغه لاریون دوه نور ګډونوال اجمل رسولي او ذبېحالله لاروی وايي، د پروپوزل له مخې باید دغه برښنا همدې ولسوالي او شاوخوا سیمو ته ورکړل شوې وای، خو ولایتي ادارې برعکس د وټهپور پر ځای ماڼوګي ولسوالي او مرکز اسداباد ته لینونه غځولي دي.
هغه په دې برخه کې ولایتي چارواکي ګرم ګڼي چې ګنې د وټپور ولسوالي له خلکو سره یې جفا کړې ده.
د دوی په وینا، ځمکې پهکې د وټهپور ولسوالي د اوسېدونکو تللي او له برښنا نه یې د دوی پر ځای نور خلک ګټه اخلي.
لاریونوالو پر ځینو چارواکو او د دې برښنا پر وېشونکو د مرګ شعارونه ورکول او دغه کړنه یې غندله.
په همدې حال کې د کونړ مرستیال والي ګلمحمد بیدار د وټهپور ولسوالي د خلکو غږ برحقه ګڼي او وايي، تخنیکي ډله یې کار کوي، څو د دې سیمې کلیو ته هم لینونه وغځوي.
د یادونې ده چې د کونړ د مناګي برښنابند چارې پر ۱۳۹۲ل کال کې پیل شوې وې چې په ۹۴ کال کې یې د ځینو ستونزو له امله کارونه په ټپه ودرېدل، خو په ۱۳۹۷ کال کې یې کارونه پیل او اوس پرانستې ته نږدې دی.
دغه برښنابند د اوبو او برښنا وزارت له لوري د ۹،۸ میلیونه امریکايي ډالرو په ارزښت جوړ شوی چې ۲،۱ مېګاواټه برښنا تولیدوي.
