د هرات د عامې روغتيا رياست مسوولان وايي، په دې ولايت کې يو ۳۰ کلن هراتی ځوان چې د کورونا ويروس نښې يې درولودې او کورونا لپاره ځانګړي شوي روغتون کې بستر و، مړ شوی دی.
د ياد ولايت د عامې روغتيا رياست وياند محمدرفیق شېرزی وايي، ياد کس د هرات ښار په «کج» سړک کې نانوايي درلوده.
د نوموړي په وينا، ياد کس ۲۴ ساعته په روغتون کې بستر و چې روغتيايي حالت يې خراب شو او تنفسي ستونزه يې ډېره شوه، نن سهار « د حمل ۱۷مه، يکشنبه» ومړ.
شېرزی زياتوي، دې ته يې فرصت ونه موند چې تشخيص يې کړي چې مړه شوي کس د کورونا ويروس درلود او که نه.
د مړه شوي کس خپلوان ادعا کوي چې هغه درې ورځې وړاندې کورونا ويروس لپاره ځانګړي شوي روغتون ته ورغی؛ خو په دومره وخت کې يې د ازمايښت پايله معلومه نه شوه.
د دوی په وينا، په دومره موده کې ورته روغتياپالانو هېڅ درمل ور نه کړ. له دې سره په هرات ولايت کې د کورونا ويروس له کبله د وژل شويو شمېر ۵ ته ورسېد.
نن سهار د عامې روغتيا وزارت اعلان وکړ چې په تېرو ۲۴ ساعتونو کې د کورونا پنخه مثبتې پېښې روغې شوې دي او په تخار ولايت کې يو ناروغ چې د تنفس ستونزه يې درلوده. مړ شوی دی.
