د عامې روغتیا وزارت مرستیال وحیدالله مجروح وايي، تېرو ۲۴ ساعتونو کې بېلا بېلو ولایتونو کې د کورونا ویروس ۱۱۱۲ شکمنې پېښې ازمایل شوي چې له دې ډلې یې ۶۸۰ پېښې مثبتې دي چې ټول هېواد کې په کووېډ ۱۹ ناروغۍ د اخته کسانو شمېر ۱۵ زره او ۲۰۵ ته لوړ شوی دی.
د مجروح په وينا، د کورونا ویروس د ۶۸۰ تازه پېښو له ډلې تر ټولو ډېرې ۳۷۱ کابل او ۱۱۱ هرات کې ثبت شوې دي.
نوموړي زياته کړه، افغانستان کې تېره یوه شپه او ورځ کې د کووېډ ۱۹ ناروغۍ له کبله ۸ کسان مړه شوي او ۲۵ بېرته روغ شوي چې د ټولو مړو شوو شمېر ۲۵۷ او د بېرته رغېدلو هم ۱۳۲۸ ته رسېږي.
دې سره ټوله نړۍ کې د کرونا ویروس د مثبتو پېښو شمېر تر ۶ میلیون او ۱۵۵ زرو اوښتی چې له دې ډلې یې څه باندې ۳ لکه او ۷۰ زره مړه شوي دي.
ټوله نړۍ کې بیا له کورونا تر ۲ میلیون او ۷۳۴ زره ډېر کسان بېرته ښه شوي دي.
