د کورنیو چارو وزارت اعلان کړی، چې د ولایتونو امنیه قومندانانو ته هدایت شوی، چې له رسنیو سره کره معلومات شریک کړي.
د کورنیو چارو وزارت مسولینو د رسنیو د تحول لسیزې په دویمې ورځې ناستې کې د یو شمېر امنیتي مسولینو له لوري له خبریالانو سره ناوړه چلن او کافي مرستې نه کول، ومنل او ژمنه یې و کړه، چې له دې وروسته به د خبریالانو ځاني خوندیتوب ته پاملرنه کوي.
د کورنیو چارو وزارت ویاند صدیق صدیقي تېره ورځ د اپریل پر ۲۶) وویل، چې د څو ولایتونو د امنیه قومندانان په موخه چې له خبریالانوسره یې ناسم چلن کړی و، له دندو ګوښه شوي دي.
څه وخت وړاندې د ملي امنیت شورا اعلان کړی و، چې ولایتي ویاندویان نه شي کولی چې امنیتي مسایل له رسنیو سره شریک کړي.
د ملي امنیت شورا پرېکړه د مدني بنسټونو او د رسنیو دفاع کوونکیو له لوري له سخت غبرګون سره مخ شوه او دغه ډول پرېکړه یې د ولسي خلکو سره د اطلاعاتو د شریکولو د بهیر پڅوالی یاد کړ.
د دغه وزارت ویاند په ناسته کې وویل، چې د کورینو چارو وزارت هڅه کوي، چې د اطلاع رسونې او اطلاعاتو ته د لاس رسي قانون په اړه د پولیسو ټولو امنیتي مسوولینو ته روزنه ورکوي، چې له دې وروسته له خبریالانو سره سم چلن وکړي.
له بل لوري ولایتي خبریالان د امنیت شورا له دې پرېکړې سر ټکوي او وايي چې د معلوماتو د شریکولو بهیر ته یې زیان رسولی دی.
دغه خبریالان وايي، چې د امنیت شورا له پرېکړې وروسته د ولایتونو امنیه قومندانانو هم له رسنیو سره اطلاعات نه شریک کول او زیاتوي چې په دې اړه د حکومت د جدي پاملرنې غوښتنه کوي.
د هرات ولایت خبریال فواد احمد وايي، چې لویدیځه حوزه کې د پولیسو امنیه قومندانان د کورنیو چارو وزارت په خلاف له رسنیو سره معلومات نه شریکوي.
د ده په وینا، که چېرې د هرات په ولایت کې کومه پېښه وشي؛ د دې ولایت د امنیې قومندان له یوې یا دوو ورځو وروسته خبرې ناستې ته وینا کوي.
د پروان ولایت خبریال احمد هنایش وايي، چې ډېر وخت د امنیه قومندانان یو بهانه جوړه وي او له رسنیو له اطلاعات نه شریک کوي. د ده په باور د ملي امنیت شورا دغه پرېکړه د اساسي قانون سره په ټکر کې ده او خلک د قانون پر بنسټ حق لري، چې له روانو خبرونو او معلوماتو نه خبر ولري.
د بغلان ولایت یو بل خبریال اجمل عمري سلام وطندار سره په خبرو کې وویل، دا ډېره سخته ده، چې ټول امنیتي مسایل دې د کابل د امنیه قومندان ویاند له ټولو ولایتي خبریالانو سره شریک کړي.
د عمري په وینا ډېر وخت خبریالان د پېښې په ځای کې وي او د پېښې له ځایه ژوندی راپورو وکوي؛ نو د تېر په څېر دا اړینه ده، چې د قانون په ولایتي ویاندویان دې په قانون په اډانه کې دوی ته معلومات ورکړي.
دا په داسې حال کې ده، چې د رسنیو او تحول لسیزې په لومړۍ ورځې کې وویل، چې سره له دې چې حقایق ترخه وي خو حقایق له خلکو او رسنیو نه پټ نه شي.
د رسنیو دفاع کوونکیو بنسټونو او خبریالان په دې تمه وه، چې د ولسمشر له لوري د اطلاعاتو ته د لاسرسي قانون په توشیح کولو سره د اطلاعاتو په برخه کې به د خبریالانو ستونزې حل شي.
د رسنیو مسولین بیا ټینګار کوي، چې تر دې مهاله د دوی پر وړاندې پرتې ستونزې نه دې حل شوي.
