د کندوز د پوهنې ریاست مسوولان وايي، په دغه ولایت کې ۲۲ ښوونځي له «وایمکس» انټرنېټ سره تړل شوي او د لمریزې برښنا د دستګاوو د ځای پرځای کولو او د کمپیوټر لب جوړولو کارونه یې ۶۰ سلنه وړاندې تللې دي.
د کندوز د پوهنې رییس نجیب ثاقب وايي، د دې پروسې په بشپړېدو سره به یاد ښوونځي د انټرنېټ له لارې د نورو ولایتونو له ښوونځیو سره وتړل شي او له ۸۳ زرو زدهکوونکي به پرمختللې ټکنالوجۍ ته لاسرسی ولري.
د ثاقب په وینا، د یادو ښوونځیو پر انټرنېټ او لمریزې برښنا ۱۰ میلیونه افغانۍ لګښت راغلی چې د ولسمشرۍ ماڼۍ د عملیاتي ادارې او سلام مخابراتي شبکې له لوري ورکول کېږي.
په کندوز کې یو ښوونکی محمدعلي حسیني وايي، د یاد سېسټم په جوړېدو سره به د زدهکوونکو معلومات او مهارتونه ډېر شي.
په کندوز ښار کې دوه زدهکوونکي میرویس او عبدالله وايي، په انټرنېټ او کمپیوټر باندې د دغه ولایت د ښوونځیو په مجهز کېدو سره به زدهکوونکي له تازه ښوونیزو موضوعاتو سره بلد شي.
کندوز د هېواد د ناامنو ولایتونو له ډلې یو دی چې په ولسوالیو کې یې ډېر شمېر ښوونځي د طالبانو تر واکمنۍ لاندې سیمو کې دي او یاده ډله پرې څارنه کوي.
