امنیتي ځواکونو تېره شپه په بلخ کې د افغان ـ ترک ښوونځيو شاوخوا ۵۰ ښوونکي او کارکوونکي ونیول.
د راپورونو له مخې، د یادو کسانو په ډله کې ۷ یې د ترکیې هېواد اوسېدونکي دي.
ویل کېږي، یاد ښوونځي اوس هم د امنیتي ځواکونو په لاس کې دي او د زدهکوونکیو لسګونه کورنۍ یې د ښوونځیو مخې ته راټول کړي دي.
معترضې کورنۍ وايي، د تېرې شپې په برید کې وهل ـ ډبول شوي او یو شمېر کسان ټپیان شوي هم دي؛ هغه ادعاوې چې سیمهييز چارواکي یې په اړه وايي، په دغو کسانو کې یو شمېر یې ښوونځیو ته د پولیسو د ننوتلو مخه نیولې او تر څېړنو وروسته به خوشې شي.
خو د پوهنې وزارت د یوې خبرپاڼې په خپرولو سره ویلي چې په بلخ کې د افغان ـ ترک ښوونځي په ارامۍ سره د «چاغ اېجوکشنل» بنسټ نه د یاد ولایت د پوهنې ریاست ته لېږدول شوي دي او پر مهال یې هېڅ ډول فزیکي چلن نهدی شوی.
په ترکیه کې د ۲۰۱۶ کال تر کودتا وروسته، د ترکیې حکومت فتحالله ګولن د یادې کودتا پر طرحه کولو تورن کړ او پر همدې استدلال چې نوموړی پر افغان ـ ترک ښوونځيو اغېز لري او ملاتړ یې کوي؛ نو د یادو ښوونځیو د بندېدو غوښتونکی شو.
په همدې اړه:
