د هیواد د شمال ختيځ زون قوماندانان په کندوز کې د طالبانو د ځپلو له پاره د چاڼيزو عملیاتو د پېل خبر ورکوي.
د ۸۰۸ سپینزر زون قوماندان شیر عزیز کامه وال د سه شنبې په ورځ یوې خبرې ناستې کې وویل، چې ژمی د امنتي ځواکونو له پاره یو ګټور فرصت دی، چې د نا امنو سیمو څخه طالبان وشړي.
کامه وال زیاته کړه، چې په کندوز کې د چاڼيزو عملیاتو وروسته به د«دښمن» دکندوز بیا نیولو تبلیغات هم شنډ شي.
جنرال کامه وال زیاته کړه، اوس هم نږدې ۲ زره او ۴ سوه وسله وال طالبان چې دکندوز د جګړې پر مهال یې زیاتې وسلې او مهات تر لاسه کړي به بېلا بېلو جبهو کې د امنیتي ځواکونو سره په جګړه دي.
په همدې حال کې د هیواد په شمال ختيځ کې د ملي اردو قوماندان غلام محی الدين غوري په دې خبري غونډه کې وویل، چې په دې چاڼيزو عملیاتو کې به د طالبانو ټول تجهیزات او وسلې له منځه یوړل شي، چې دغه عملیات به پرته له کوم ځنډ مخکې یوړل شي.
ټاکل شوې دا عملیات په داسې مهال ترسره شي، چې د کندوز اوسېدونکي په دغه ولایت د طالبانو د بیا برید اندېښنه ښکاره کوي.
او همدا ډول وسله وال طالبان د کندوز ښار په ځېنو څنډو کې د وخت په وخت جګړو ګامونه هم پورته کوي.
د روان کال د تلې په ۶مه طالبانو په یو پراخه برید کې د کندوز ښار تر خپلې ولکې لاندې راوست او د۳ ورځو له پاره یې پرې واکمني وکړه، چې د بشپړې حکومتي واکمنۍ له پاره عملیات تر ۲ اونیو جاري وو.
