کرېکټ ملي لوبډله د ویسټ انډیز سینټ لوشیا جزیرې ته ورسېدله

افغان کرېکټ ملي لوبډله د خواشینوونکو ۲۰ اوریزه لوبو وروسته د ویسټ انډیز سینټ کېټس جزیرې څخه د ویسټ انډيز یوې بلې جزیرې سینټ لوشیا ته تللې ده.

د افغانستان کرېکټ بورډ له‌خوا د ورکړل شویو معلوماتو له مخې، افغان کرېکټ ملي لوبډله له سینټ کېټس جزیرې د ویسټ انډيز د کرېکټ اتل ډېرن سمي جزیرې سینټ لوشیا ته رسېدلې او هلته یې د ۵۰ اوریزه لوبو له‌پاره خپل تمرینات پیل کړي دي.

ټاکل شوې د افغانستان او ویسټ انډيز کرېکټ ملي لوبډلو ترمنځ به د ۳ پنځوس اوریزه لوبو لړۍ راتلونکې جمعه د شپې ۱۱ بجې پیل شي، چې په کې د کریم جنت او نجیب ځدران په ځای رحمت شاه زرمتی او ناصرجمال په کرېکټ ملي لوبډله کې شامل وي.

د افغانستان او ویسټ انډيز کرېکټ ملي لوبډلو ترمنځ به د دغې لړۍ دویمه لوبه د جون په ۱۱ او وروستۍ لوبه به د جون په ۱۴ نېټه په همدې سینټ لوشیا کرېکټ لوبغالي کې ترسره شي، چې د ډېرن سمي په نوم نومول شوی دی.

دا په داسې حال کې ده، چې کوربه ویسټ انډيزۍ کرېکټ ملي لوبډلې په بهترینه بالینګ له افغانستان څخه ۳ واړه ۲۰ اوریزه لوبې په سینټ کېټس لوبغالي کې په اسانۍ وګټلې.