د افغانستان کرکټ بورډ په پلان کې لري، چې په ننګرهار ولایت کې د کرکټ لوبې له پاره یو بل معیاري کرکټ لوبغالی هم جوړ کړي.
د کرکټ بورډ له خوا په خپره شوې خبرپاڼه کې ویل شوي، چې په همدې موخه د افغانستان کرکټ بورډ اجرایوي مشر پرون ننګرهار ته په خپل سفر کې د یاد ولایت ښاروال سره لیدلي دي.
خبرپاڼه زیاتوي، چې د کرکټ بورډ اجرایوي مشر شفیق الله ستانکزي، چې ورسره د کرکټ بورډ مرستیال حاجي عزیزالله فضلي هم ملتیا کوله د ننګرهار ولایت له ښاروال حمدالله افغان سره ولیدل.
دخبرپاڼې له مخې، د کرکټ بورډ چارواکو له افغان څخه د ننګرهار ولایت په مرکز جلال اباد ښار یوه مهمه برخه کې د کرکټ لوبغالي د جوړونې له پاره د ځمکي غوښتنه وکړه.
د ننګرهارښاروال حمد الله افغان هم د افغانستان کرکټ بورډ له پلاوي سره ژمنه وکړه، چې په جلال اباد ښار کې به د کرکټ بورډ په واک کې د کرکټ لوبغالي جوړونې له پاره ځمکه ورکړي.
د کرکټ بورډ چارواکو هم د ښاروال حمد الله افغان له خوا د ځمکې د ورکړې لپاره له ټټر وهلو مننه وکړه، چې د کلونو راهیسې د کرکټ بورډ غوښتنه وه.
دیادونې وړ ده، چې د کرکټ بورډ چارواکو تل ننګرهار ولایت د افغانستان د کرکټ کور یاد کړی، خو یاد لوبغالي تراوسه په مرکز کې د کرکټ لوبغالي څه چې یوه د کرکټ روزنیزه اکاډمي هم نه لري.
په ننګرهار ولایت کې د کرکټ یو لوبغالی شتون لري، چې له ښار څخه څو کیلو میټره لرې پروت دی او یواځې د کرکټ بورډ له خوا د رسمي سیالیو ترسره کولو لپاره کارول کیږي او د یاد ولایت لوبډلې او لوبغاړي په کې د لوبیدو اجازه او هم لوبغالي ته د ورتګ وس او توان نه لري.
دغه راز ننګرهار ته د کرکټ بورډ د لوړو پوړو چارواکو په سفر کې د ننګرهارغازي امان الله کرکټ لوبغالي د (پویلین) د بشپړیدو او ډير ژر د رسمي پرانیستلو خبر هم ورکړل شو.
یاد لوبغالی، څو کاله وړاندې جوړ او د لوبې له پاره پرانیستل شو، خو لا یې هم د (پویلین) برخه په رسمي توګه نه ده پرانیستل شوې.
