.jpg)
د کرنې، اوبولګولو او مالدارۍ وزارت په هېواد کې د کرنې د ودې او پراختیا او همداراز د کرنیزو محصولاتو د زیاتولو په پار په افغانستان کې د«کرنې د لارې نقشه) جوړه کړه.
د کرنې، وزارت د کرنې او مالدارۍ مرستیال حمدالله همدرد نن په یوې خبري غونډې کې وویل چې د «کرنې د لارې نقشه» پنځه عمده برخې لري او له بزګرانو سره له کرکېلي تر مارکېټه ملاتړ کوي. ښاغلي همدرد زیاتوي، پهدې نقشه کې د کرنې د پراختیا پر وړاندې پرتو خنډونو ته حللارې او د کرنیزو محصولاتو زیاتولو په هکله وړاندوینه شوېده.
د ده په وینا، د کرنې سکټور ته عمومي کتنه، د کرنیز ځنځیري ارزښتونو لوړول، د کرنې اړوندو قوانینو ته بیا کتنه، د کرنې سکټور ساختار جوړول او له هېواده بهر د افغانستان د کورنیو تولیداتو د رقابتيکولو په پار چارچوب جوړول د «کرنې د لارې نقشې» مهمې برخې دي.
د ده په خبره، د کرنې د لارې نقشې سره به ډېر کاري فرصتونه هم برابر شي.
د کرنې، وزارت د کرنې او مالدارۍ مرستیال وایې چې د «د کرنې د لارې په نقشه» کې د خوړو پر خوندیتون او د وریجو او غنمو د محصولاتو په زیاتولو هم تمرکز شویدی. ده همداراز ټنیګار وکړی چې یوازې د غنمو په برخه کې ۱.۲ بیلیونه ډالر پانګونه شوېده.
ښاغلي همدرد وویل، د انګورو، پستې او انارو کلنۍ ارزښت ۳۹۲ میلیونه ډالر دی او د دې نقشې پر بنسټ به د دغو ونو د پراختیا او محصولاتو د زیاتوالي په برخه کې جدي پام وشي.
سابه او زړې هم د کرنیزو توکو مهمې برخې دي چې د حمدالله همدرد په خبره ۶۴۵ میلیون ډالر ارزښت لري. طبي او صنعتي بوټي او همداراز مالدارۍ هم د کرنې د لارې په نقشه کې له مهمو او د پام وړ موضوعاتو څخه دي. ښاعلي همدرد وایي، چې د مالدارۍ برخه هم ۱.۵ میلیارډ ډالر ارزښت لري، چې له دې وروسته به د مالدارۍ سکټور ته هم جدي پام کېږي.
په ورته وخت کې د دې وزارت مسوولان وايي چې سږکال د رعفرانو او جلغوزیو په محصولاتو کې زیاتوالی راغلیدی.
د کرنې وزارت ویاند اکبر رستمي بیا وویل چې په یوې میاشت کې د هوايي دهلیزونو له لارې شاوخوا ۶۰۰ ټنه جلغوزي چین ته لېږدول شويدي.
د دې وزارت د مسوولانو په وینا، د کرنې سکټور بېلابېلې برخو له ډلې د اوبولګولو په برخه کې د یو ملي برنامې نهشتوالی، د کرنیزو زېربناوو په برخه کې ستونزې او د سړوخونو او پروسېس مرکزونو د کموالي له اړخه له ګڼو خنډونو سره مخ دي چې د کرنې د لارې په نقشه کې دغو خنډونو ته حللارې هم په پام کې نیول شوېدي.
