د امریکا متحده ایالاتو دفاع وزیر شتون کارتر د سې شنبې په ورځ (جولای ۱۲مه) په یوه نااعلان شوي سفر کابل ته راغی.
نوموړي له ولسمشر محمد اشرف غني سره د یوې خبري ناستې په ترڅ کې وویل، چې د سفر موخه يې کابل ته، په افغانستان کې د دوی د ځواکونو پاتې کېدل،مالي ژمنې او په هېواد کې د امریکايي ځواکونو د قوماندان واکونو زیاتیول دي.
نوموړي زیاته کړه، په افغانستان کې د امريکايي ځواکونو د قوماندان په واکونو کې داسې زیاتوالی راغلی، چې پخوا به د اړتیا په صورت کې د جګړې په ډګر کې له افغان ځواکونو سره مرسته کېده، خو اوس به په افغانستان کې میشت امریکايي ځواکونه به د پلان سره سم د افغان ځواکونو سره اوږه په اوږه جنګيږي.
نوموړي زیاته کړه، چې له پاکستان سره د دوی ستراتيژيکې اړيکې پخوا هم وې او اوس هم دوام لري، خو زیاته يې کړه، چې په هرځای کې د دوی ګټو ته زیان ورسيږي، نو دوی به یې پر وړاندې جدي مبارزه وکړي.
همدارنګه افغان ولسمشر محمد اشرف غني وویل، چې په افغانستان کې امريکايي ځواکونو قوماندان ته د نوي دندې په ورکولو سره به کارونه په خورا چټکۍ سره پرمخ یوړل شي.
نوموړي زیاته کړه، چې د امریکايي ځواکونو نوي قوماندان ته د نویو واکونو په ورکولو سره کوم کار، چې پخوا په ۳ میاشتو کې کېده اوس به په درېيو ورځو او یا هم درېیو ساعتونو کې ترسره شي.
همدارنګه ولسمشر غني زیاته کړه، چې افغان حکومت له پاکستان سره د اړيکو خرابوالي غوښتونکی نه دی، بلکې غواړي، چې د دوی په اړیکو کې وضاحت رامنځ ته شي.
غني وویل، افغان دولت ژمن دی، کومې مرستې چې د نړېوالو ټولنو له خوا له دوی سره کيږي په پوره شفافیت سره يې ولګوي.
د امریکا د متحده ایالتونو د دفاع وزیر شتون کارتر د وزارت په دوره کې دا درېيم ځل دی، چې افغانستان ته سفر کوي او دا سفر يې داسې مهال کيږي، چې افغان ولسمشر د وارسا په ناسته کې پر پاکستان جدي نيوکې وکړې او اسلام اباد يې هم له امله ژور خپګان ښکاره کړ.
