د ملکي وګړیو د خوندیتوب او عدالت غوښتنې ډلې نن په کابل کې د یوې خبري غونډې پر مهال په ۲۰۱۸ زېږدیز کال پر مهال د ملکي وګړیو د مرګژوبلې راپور خپور کړ.
د دغه راپور له مخې، د تېر میلادي کال پر مهال د نورو ولایتونو په پرتله په کابل کې د ملکي وګړیو د مرګژوبلې کچه ډېره وه او ورپسې ننګرهار، غزنی، هلمند او پکتیا په ترتیب سره دویم، درېیم، څلورم او پنځم ځای لري.
په دغه راپور کې لیکل شوي چې د ۲۰۱۸ زېږدیز کال پر مهال په کابل کې ۲۹ پېښې شوي چې له کبله یې ۵۱۰ ملکیان وژل شوي او ۱۱۰۷ نور ټپیان دي.
د ملکي وګړیو د خوندیتوب او عدالت غوښتنې ډلې غړی عزیزاحمد تسل وايي، د دغو پېښو ډېره برخه ځانمرګي بریدونه، د سړکغاړې ماینونو چاودنې او د هوايي ځواکونو عملیات جوړوي.
د تسل په وینا، د تېر میلادي کار اکټوبر او جولای میاشتې تر ټولو خونړۍ وې او یوازې په جولای میاشت کې ۱۰ بریدونه شوي دي.
د ملکي وګړیو د خوندیتوب او عدالت غوښتنې ډله وايي، د دوی د موندنو له مخې، په تېر میلادي کال کې د ملګي وګړیو مرګژوبله په بامیان او دایکندي ولایتونو کې صفر وه.
په راپور کې لیکل شوي چې په ۲۰۱۸ زېږدیز کال کې د افغانستان د امنیتي هوايي ځواکونو د ۱۹ عملیاتو پرمهال ۱۳۶ ملکي وګړي وژل شوي او ۸۷ نور ټپیان دي.
د رپوټ په دوام کې راغلي؛ چې د طالبانو په سیمو کې د سړک غاړې ماینونو له امله ډېر ملکي وګړي تلف شوي دي.
د ملکي وګړیو د خوندیتوب او عدالت غوښتنې ډله له وسلهوالو ډلو په وړاندې د حکومت په کمزورۍ نیوکه کوي او دغه راز د جګړې له دواړو لوریو غواړي چې د جګړې پرمهال ملکي وګړیو ته زیان و نه رسوي.
