کابل کې د ښځینه فوټبال لوبغالي جوړېدو ډبره کېښودل شوه

د لومړي ځل له پاره د افغانستان فوټبال فدراسیون په احاطه کې د نجونو فوټبال سیالیو له‌‌پاره د لوبغالي جوړولو ډبره کېښودل شوه.

د فوټبال فدراسیون تخنیکي مرستیال او د فوټبال لوبډلې پخواني روزونکي یوسف کارګر وویل، سږکال د فوټبال لوبډلې له‌پاره پرمختیايي کال دی.

د نوموړي په وینا، سږکال به دافغانستان ښځینه فوټبال لوبغاړې د لومړي ځل له‌پاره له یو معیاري فوټبال لوبغالي برخمن شي.

د نوموړي پروینا د دې لوبغالي په جوړېدو سره ښځینه فوټبال لوبغاړې دلته سیالۍ کوي او د نارینه‌وو فوټبال لوبغالو په پرتله کوچنی دی.

دا لوبغالی به د الکوزي نړیوال شرکت په مالي مرسته د یو افغاني شرکت له خوا په راتلونکو څوو میاشتو کې جوړ او ګټې اخیستنې ته وسپارل شي.

د ماریې په نوم یوې ښځینه فوټبال لوبغاړې رسنیو سره خبرو کې وویل، دا یو نوښت دی او د فدراسیون له دې چارې خورا خوښ دي.

د افغانستان د فوټبال فدراسیون سکرترجنرال علي رضا اقازاده رسنیزه غونډه کې وویل، د فوټبال نړیوالې شورا له خوا یې د بلخ او کندهار ولایتونو د فوټبال لوبغالو له‌پاره بودیجه ترلاسه کړې، چې په مصنوعي چمن به وپوښول شي.

اوسمهال یوازې د کابل او هرات فوټبال لوبغالي په مصنوعي چمن پوښول شوي او راتلونکی کال به د جلال اباد فوټبال لوبغالي کې هم مصنوعي چمن کېنوي.

اقازاده کابل ته د پېټر شیګرټ راتګ او د فوټبال فدراسیون یو کاندید سره یې د هغه لیده کاته وغندل.

علي رضا اقازاده زیاته کړه، پخواني روزونکي پیټر شیګرټ د فوټبال ټول اصولو ترپښو لاندې کړي او دوی به دغه مسله په قانوني توګه له اسیایي او نړیوالې فوټبال شورا سره شریکه کړي.

د یو بل خبر له مخې د بدلون وخت تر نوم لاندې یوې بلې خبري غونډه کې هارون پوپل او پېټرشیګرټ د افغانستان فوټبال فدراسیون یې د فوټبال لوبډلې په ګډوډولو تورن کړ.

دوی وویل، فدراسیون په دې لټه کې دی، چې مشري انحصار کړي او د افغانستان کورنیو فوټبال لوبغاړو ته د لوبېدو چانس ورنه کړي.

پوپل تور پورې کړ، فدراسیون په ناقاونه توګه د ولایتونو له پاره د فوټبال فدراسیون مشران ټاکي.