د نفوسو د احوالو ثبت مرکزي ادارې ویاند روحالله احمدزي نن کابل کې یوې خبري غونډې ته وویل، د هېواد په کچه د لس میلیونو پېژندپاڼو وېش لهپاره پوره چمتووالی لري او دا لړۍ په زغرده په مخ ځي.
ښاغلی احمدزی زیاتوي، کوچیانو ته د پېژندپاڼو ورکولو لهپاره هم ګرځنده ډلې کار کوي او تر دا مهاله د هېواد په کچه شاوخوا یو میلیون پېژندپاڼې وېشل شوېدي.
د نوموړي په وینا، له امنیتي ادارو یې د پېژندپاڼو د وېشلو مرکزونو د امنیت ټینګولو جدي غوښتنه کړې او امنیتي ارګانونو د کابل ځېنو امنیتي حوزو کې د پېژندپاڼو وېشلو لهپاره ځایونه برابر کړي چې شونې ده، د سهشنبې په ورځ کابل کې ۱۸ مرکزونه پرانېستل شي. د ده په خبره، د دې بهیر پیل له دشتبرچي نه کوي چې ۳مرکزه به ۳مه، ۷مه، ۱۳مه او ۱۶مه حوزه کې پرانېزي.
د نفوسو د احوال ثبتولو مرکزي ادارې ویاند زیاته کړه، د پېژندپاڼې ترلاسه کولو لهپاره باید د ګذر وکیل یا د کلي ملک او یو دولتي مامور د پېژندپاڼې غوښتونکي تصدیق وکړي او د پېژندپاڼو وېشلو پروسې په اړه شکایت کوونکي کولی شي خپل شکایتونه ولسوالۍ، ولایت او لویو ښارونو کې د دوی اړوند ادارو کې ثبت کړي.
همداراز ښاغلي احمدزي هغه ګنګوسې هم رد کړې چې په یو شخص ته څو پېژندپاڼې ورکړل شوېدي.
د نفوسو د احوالو ثبتولو ادارې ویاند روحالله احمدزی زیاتوي، د برښنایي پېژندپاڼو وېش لهپاره هم پوره چمتووالی نیول شوی او دغه بهیر به له ۳ تر ۵ کلونو پورې دوام وکړي.
هغه وايي، راتلونکې اونۍ به کابل کې د برېښنايي پېژندپاڼو وېشلو یو مرکز او ۲۰ورځې وروسته هم دویم مرکز پرانیستل شي چې راتلونکیو ۶میاشتو کې به دغه شمېر ۵ مرکزونو ته لوړ شي او ورپسې به دا بهیر ولایتونو او ولسوالیو ته وغځول شي.
