په کابل کې د پوهنې او حج او اقافو وزارت نن سه شنبې د (می پر ۳مه) په خپل منځ کې یو پوهاوی لیک لاسلیک کړ، چې له مخې به یې په هېواد کې په ګډه له بې سوادۍ سره مبارزه کېږي.
د پوهنې وزیر اسدالله حنیف بلي د دې سند د لاسلیکولو پر مهال وویل، دوی په پام کې لري، چې د هېواد په کچه په ټولو جوماتونو او تکیه خانو کې د ملا امامانو او خطیبانو په واسطه ډېر عمره کسانو او کوچنیانو ته د ښوونځي له پیله مخکې، د لیک او لوست ځېنې مواد تدریس کړي.
د پوهنې د وزیر پر وینا، ملا امامانو او خطیبانو ته به د تدریس په بدل کې د دې وزارت له خوا یو اندازه حق الزحمه هم ورکول کېږي. په خبره یې دا لړۍ به د هېواد په ښار او اطراف کې روانه وي او توانېدلي، چې همدې کسانو ته په پښتو، دري او ازبکي ژبو کتابونه چاپ کړي.
دغه راز د حج او اوقافو وزیر فیض محمد عثماني وویل، چې د هېواد په څه باندې ۱۵۰ زرو جوماتونو کې چې وزارت سره ثبت دي، خو ځېنې ناثبت جوماتونه هم شته، چې هڅه به وکړي چې د پوهنې وزارت سره یو ځای د ټولو له لارې به د زده کړو کار پیل شي.
د ده پر وینا، دا کار به ډېر ژر، په تېزۍ سره پيل شي او کوښښ به وشي، چې د همدې ملا امامانو او خطیبانو په واسطه دا بهیر په ټولو کلیو او بانډو کې جاري کړي.
د سواد زده کړې د اړوندو چارواکیو پر وینا، اوسمهال په ټول هېواد کې ۳۸ سلنه وګړي باسواده دي او په روان کال کې د سواد د زده کړې په پار شاوخوا ۱۶ زره کوروسونه فعالیت کوي.
