دا لاریونونه نن له غرمې وروسته د پښتون ژغورنې غورځنګ غړي، ارمان لوڼي د وژنې خلاف ننګرهار، کونړ، خوست، پکتیکا، کابل او یو شمېر نورو سیمو کې وشول.
د روانې میلادي نومبر میاشتې پر دویمه پاکستاني حکومت د بلوچستان په پښتونمېشتې ولسوالۍ، لورلای کې د پښتون ژغورنې غورځنګ د سر سړي، ارمان لواڼی په وهلو، وهلو ووژلو چې له امله یې پاکستان، افغانستان او نوره نړۍ کې د پښتنو او غیرپښتنو احتجاجونه راوپارېدل.
وژل شوی ابراهیم ارمان لوڼی د یاد غورځنګ د فعالې وړانګې لواڼۍ ورور و.
ننګرهار او کونړ کې سلګونه لاریونوالو د ارمان لوڼي بېرحمانه وژل وغندل او پر پاکستان حکومت یې غږ وکړ چې پښتون وژنه ودروي.
کونړ کې هم ګڼ شمېر کسانو اسداباد ښار کې د یو مارش په ترسره کولو سره د ارمان لوڼي د وژنې د غندلو تر څنګ له پاکستاني حکومته پر کونړ او نورو ولایتونو د توغندیزو بریدونو د درولو غوښتنه هم کوله.
دوی ویل، پاکستاني حکومت له ۷۰ کالو راهیسې د خېبرپښتونخوا پښتانه له انساني حقونو محروم ساتلي دي، وژلي یې دي او له ژونده یې محروم کړيدي.
هاخوا سویلختیځ خوست کې هم سلګونو کسانو د پاکستاني حکومت او ارمان لوڼي وژلو خلاف لاریون کړی.
دوی د پښتون ژغورنې غورځنګ په ملاتړ شعارونه ورکول او ویل یې، پښتنو تل خپل حقوق د عدم تشدد پر بنیاد غوښتي؛ خو برعکس پاکستاني حکومت ورسره تشدد کړی او هغوی یې ځپلي دي.
په ورته مهال له کابل، مزارشریف، پکتیکا ورهاخوا، د پاکستان په ډېرو ښارونو، جرمني، امریکا او سویډن کې هم د پښتون ژغورنې غورځنګ په ملاتړ او د ارمان لوڼي د وژلو او پاکستان خلاف لاریونونه شوي او ځېنو سیمو کې لا هم روان دي.
پاکستان کې پر پښتنو د شویو او روانو ظلمونو خلاف د منظور پښتین په مشرۍ د پښتون ژغورنې غورځنګ کال وړاندې رامنځته شوی چې تر اوسه یې په لر، بر او ګرده نړۍ کې غږ بدرګه شویدی.
