کابل پولیسی‌نینگ ایتیشیچه، هییت کونلریده پلاستیکی قورال ساتووچی دکاندارلرنی توتقونگه آله‌دی.
کابل امنیه قومندانی جنرال عبدالرحمان رحیمی، دوشنبه کون هییت کونلری امنیتی چاره تدبیر کوریلیشی خصوصیده خبرچیلرگه معلومات بیریب و شونینگ‌دیک، مملکت عایله اعضالریدن باله‌لرینی پلاستیکی قورال آلیش‌لریگه توسیق بولیش‌لرینی سوره‌دی.
روزه بیره‌م هییتی‌ده پلاستیکی قورال باعث یوزلرچه باله زیان کورگنی توغری‌سیده گزارش ترقه‌تیلگنی‌دن کیین، مملکت ایچکی ایشلر وزیرلیگی، افغانستان‌ده پلاستیکی قورال ساتیلیشی باشقریلیشینی معلوم قیلدی.
شونینگ‌دیک، ایچکی ایشلر وزیرلیگی، امنیتی کوچلردن مملکت‌ده پلاستیکی قورال ساتیلیشی باشقریشینی سوره‌دی. اوشبو وزیرلیک‌نی ایتیشیچه، سوداگرلیک وزیرلیگی و صناعت و سوداگرلیک اتاقی همکارلیگی‌ده، پلاستیکی قورال و باشقه خطرلی اسکونه‌لر مملکت‌ده آلیب کیلینیشی توسیله‌دی.
جناب رحیمی‌گه کوره، کابل پولیسی باشقه امنیتی اداره‌لر بیلن بیرگه‌لیک‌ده قربان بیره‌م هییت کونلرده کابل شهری امنیتی تأمین‌لش خصوصیده چاره تدبیر کورگن‌لر. کابل پولیس قومندانی‌گه کوره، اوشبو چاره تدبیرگه، مسجدلر، پارک‌لر، تفریگاه‌لر و کابل کته یوللری شامل بوله‌دی.
رحیمی‌نینگ کابل یشاوچیلری‌گه ایشانچ بیریشیچه، امنیتی کوچلر، هییت کونلریده امنیت‌نی یخشی صورتده تأمین‌له‌یدی.
شونینگ‌دیک او، خلق‌دن شبهه‌لی نرسه‌لر توغری‌سیده پولیس‌گه خبر بیریش‌لرینی سوره‌دی.
جناب رحیمی‌نینگ، سونگی ایکی هفته‌ده کابل پولیسی یوتوقلری توغری‌سیده ایتیشیچه، 95 جنایی واقعه توغری‌سیده 138 کیشی عیب‌لنیب توتقونگه آلینگن. رحیمی‌گه کوره، بو کیشی‌لر قتل، اوغیریلیک و تروریستی فعالیت‌لرگه عیب‌لنیب توتقونگه آلینگن.
کابل پولیسی شونده‌ی بیرحالده، هییت کونلری امنیت تأمین‌لنیشی خصوصیده خلق‌گه ایشانچ بیره‌دی، سونگی کونلرده کابل شهری نیچه مقناطیسی ماین پارتله‌شی‌گه گواه بولگن.
