د ملي دفاع وزارت ویاند جنرال دولت وزیري وايي چې په کابل کې د امریکا، افغانستان، پاکستان او منځنۍ اسیا د لوړپوړیو پوځي چارواکیو غونډه د نشهیي توکیو او ترهګرۍ پرضد مبارزه کې د دغو هېوادونو هڅو همغږي کولو په موخه جوړه شوې.
وزیري سلاموطندار ته وویل دغه غونډه دوه ورځنۍ ده او د تېرې ورځې په غونډه کې په افغانستان کې د امریکا او ناټو ځواکونو قوماندان جنرال جان نیکلسون، د افغانستان، اوزبیکستان او قزاقستان هېوادونو لوی درستیزانو ګډون کړی وو.
د ښاغلي وزیري د معلوماتو لهمخې، نن ورځ (سه شنبه) د پاکستان پوځ لوی درستیز قمر باجوه هم په غونډه کې ګډون کړی دی.
دغه راز ولسمشر اشرف غني هم د اوزبیکستان او قزاقستان له لوی درستیزانو سره لېدلي او له هغوی یې غوښتي چې په اقتصادي او امنیتي برخو کې افغانستان سره همکارۍ پراخې کړي.
د سویلي اسیا او افغانستان لهپاره د امریکا ولسمشر ډونالډ ټرمپ د نوې کړنلارې له اعلان وروسته دا د امریکا او سیمې هېوادونو د لوړپوړیو پوځي چارواکیو لومړنۍ غونډه ده چې په کابل کې جوړېږي.
