کابل ولایتی نینگ میربچهکوت تومنیده برق پایهسی بوزیلگنیدن بیر هفته اوتگن بیرحالده، ایچکی ایشلر وزیرلیگی 6 کیشیلیک بیر گروه نی مذکور برق پایهسی بوزیلگنی حقیده عیبلب قولگه آلگن.
بوگون (شنبه 13- ثور) ایچکی ایشلر وزیرلیگی بیر اعلامیه نشر قیلیب ایتیشیچه، مذکور کیشیلر اوتگن 24 ساعت ده یولگه قوییلگن عملیات جریانیده قولگه آلینگن. شونینگدیک اعلامیه گه یازیلیشیچه، قولگه آلینگن کیشیلر ترورچیلیک هجوملرنی ریجهلنتیریش گه عیبلنگن.
اعلامیه گه کوره، مذکور گروه نی کابل ولایتی نینگ قرهباغ تومنیده طالبان تامانیدن ناملنگن ولسوال ایناغهسی، گل پادشاه رهبرلیک قیلهدی ایکن.
شونینگدیک ایچکی ایشلر وزیرلیگی نینگ ایتیشیچه، بو گروه قرهباغ، میربچهکوت و بگرام تومنلریده ترورچیلیک فعالیتلر قیلهدی ایکن.
ایچکی ایشلر وزیرلیگی نینگ اعلامیهسیده کیلیشیچه، پولیس مذکور کیشیلرنینگ یانیدن 2 کلاشینکوف، راکت آتووچی و حربی جهازلر قولگه کیلتیرگن.
اوتگن هفته (یکشنبه کیچه 7- ثور) کابل ولایتی میربچهکوت تومنی نینگ میرزاخیل قیشلاغیده 220 کیلوولت وارداتی برق پایهسی ناتانیش قوراللی کیشیلر آرقهلی نابود ایتیلدی. برشنا شرکتی وارداتی برق پایهسی نابود ایتیلگنیدن کیین، بو پایه قیته قوریلیشی کمیده 300 مینگ دالر خرهجت کوتاریشی ممکن دیدی.
