.jpg)
توشونیب و کوریب اوتیشی قیین کورینه‌دی و هر بیر قدم باسگنده سینیق شیشه‌لری سیسی حس ایتیله‌دی. سینیق شیشه‌لر، تیمیر پارچه‌لری و توده‌لنگن توراق و گرد ساحه‌نی قاپلب آلگن. نیچه کیشی بیل و کراچی بیلن پارتلش نتیجه‌سیده اینگیلگن تیمیر پایه اطرافیده‌گی تاش و توپراقلرنی تازه‌له‌یدیلر.
اوتگن کون «دوشنبه» ملی مدافعه وزیرلیگی نینگ لوژستک ریاستی پارتلش هجوم گه دوچ کیلدی، نتیجه‌ده 6 کیشی هلاک و باشقه 100 دن آرتیق کیشی یره‌لندی. محل یشاوچیلریدن بیرقطاری بیلن صحبت اوتکزگنیم‌دن سونگ، یره‌دارلرنی کوریش اوچون باشکینت کسلخانه‌لریگه باش اوردیم. باله‌لر ساغلیگی‌نی سقلش کسلخانه مسؤوللری نینگ ایتیشیچه، پارتلاوچی ماده توله بولگن موتر پارتله‌شی عاقبتیده یره‌لنگن باله‌لر بو کسلخانه گه آلیب کیلینگن و یره‌لری یینگیل بولگنی سبب، اویلریگه قیتگن‌لر.
وزیراکبرخان کسلخانه‌سی باش طبیبی نجیب‌الله نثارنینگ ایتیشیچه، اوتگن کون یوز بیرگن پارتلش‌ده یره‌لنگن 38 کیشی بو کسلخانه گه آلیب کیلینگن و بو آره‌دن 1 ته‌سی جان بیرگن. 2 ته‌سی حاضرهم دارولنه‌دی و باشقه یره‌دارلرنینگ یره‌لری یینگیل بولگنی باعث، رخصت بیریلگن.
ینه-ده پارتلش یوز بیرگن منطقه گه قیتدیک. بو ییرده فاضل بیلن اوچره‌شدیم؛ فاضل پارتلش یوز بیرگن محل یقینیده کیچیک بیر ییگولیک آذیق-آوقت ساتووچی بیر دکانده ایشله‌یدی. او، پارتلش نتیجه‌سیده یره‌لنگن ایکن، بیراق بیر کوندن سونگ، دکان گه کیلگن؛ بو دکانده تیمیر پارچه‌لریدن باشقه نرسه قالمه‌گن.
فاضل نینگ ایتیشیچه، دکانی گه تامان باره‌یاتگن چاغده، کوتیلمه‌گن حالت‌ده ییر قیمیرلگنینی سیزگن و اوندن سونگ، کوچلی بیر سیس اونی هوش‌سیز قیلگن.
فاضل نیچه دقیقه دن سونگ هوش گه کیله‌دی و اوزینی بیر موترگه ییتکیزه‌دی و ینه-ده هوش دن کیته‌دی. هوش گه کیلگنیدن سونگ، اوزینی کسلخانه ده تاپگن.
.jpg)
یره‌لنگنلردن بیری فیصل، وزیراکبرخان کسلخانه‌سیگه ییتکیزیلگن و او هم مکتب اوقووچیسی دیر. فیصل گه کوره، فوتبال مشقی اوچون فوتبال فدراسیونی تامان باره‌یاتگن چاغیده، کوچلی بیر پارتلش گه روپه‌ره بوله‌دی. فیصل نینگ ایتیشیچه، اوچ باله مکتب کییمی بیلن نیچه مترلیگی‌ده ایکن، بیراق پارتلش‌دن سونگ، هوش گه کیلگنیدن کیین، باشقه اولرنی کورمه‌گن.
فیصل نینگ قول و آیاقلری شیشه و آغاچ سینگنی باعث، یره‌لنگن، بیراق او نیچه مترلیگی ده یوریب باره‌یاتگن اوچ باله توغریسیده خواطر بیلدیره‌دی. اونینگ ایتیشیچه، باله‌لر اوندن کوره پارتلش گه یقین ایکن و احتمال باریچه اولر تیریک قالمه‌گن.
فوتبال فدراسیونی یقینیده جایلشگن گلبهار تاور قوروقچی‌لریدن بیری صفی‌الله حمیدی نینگ ایتیشیچه، پارتلش یوز بیریشی‌دن 25 دقیقه اوتگنیدن سونگ، امنیتی کوچلر و آمبولانس‌لر محل گه ییتیشگن. حمیدی گه کوره، امنیتی کوچلر و هجومچی‌لر آره‌سیده اوروش آقشام گچه دوام ایتگن و هجومچی‌لر محل‌ده‌گی اولتیریش اویلردن سنگر صفتیده فایده‌لنگن.
کابل شهری پارتلش هجوم گه گواه بولگن بیرچاغده، آمریکا و طالبان گروهی نینگ نماینده‌لری قطرده افغانستان تینچلیک لایحه‌سی توغریسیده مذاکره بیلن مشغول ایدیلر.
