اصلاح و تغیر یاشلر ترماغی، دوشنبه کون 26- اسد کابلده پاکستان و طالبلرگه قرشی کمپاین یولگه قویدی. اوشبو ترماغ اعضاسی بو کمپاینده مملکت یشاوچیلریدن طالبلر حرکتی و پاکستاننینگ تروریستی سیاستلریگه قرشی بیرلیکلرینی سقلهشینی سورهدی.
اولر «پاکستان قاتل، او بیلن دوستلیک قیلیش باطل»، «خلق آچلیکدن اولهدی، امیریکه تینچ تورهدی»، «پاکستان بیزلرنینگ قانیمیزگه چنقهگن، طالبلر بیزلرنینگ قانیمیزنی توکهدی» دیب شعار بیریب پاکستانگه قرشی نفرتلرینی بیللی قیلگن.
اصلاح و تغییر یاشلر ترماغی، پاکستاننی مملکتدهگی ناتینچلیکلر اصلی عاملی بیلیب و اوشبو مملکتنی افغانستان ایچکی ایشلریگه قول اوزهتیشگه عیبلهیدی.
اوشبو ترماغ اعضاسی، طالبلر بیلن اوتکزیلهدیگن تینچلیک مذاکر توختهتیلیشینی سورهب و پاکستان برابریده امیریکه و ناتو حرکتلریدن تنقید قیلگن.
اولر، امیریکه و انگلستان مملکتلریدن تنقید قیلیب ایتیشیچه، پاکستان اوشبو ایکی مملکت مالی یاردمی بیلن افغانستانده ناتینچلیکلرنی شدت لنتیرهدی.
شونینگدیک، اوشبو ترماغ اعضاسینینگ ایتیشیچه، اوتکن 14 ییلده پاکستان عصیانچیلیک، بنگی وارماده قاچاقی، خودکش و پارتلش هجوملریدن حمایت قیلگن و افغانستان حکومتیگه قرشی عصیانچیلرگه اوز توپراغیده جای بیرگن.
مملکت یشاوچیلرینینگ، پاکستانگه قرشی نفرتی، ایکی هفته آلدین کابل شهری شاه شهید منطقهسیده یریم کیچه یوزبیرگن پارتلش هجوم نتیجهسیده 20 دن آشه کیشی هلاک بولیب و باشقه 400 دن آشه کیشی یرهلنگنیدن کیین اوج آلدی.
شونینگدیک، ملی امنیت ریاستی بیر خبرنامه ترقهتیب، اوشبو هجومگه پاکستان حربی تشکیلاتلریدن بیرقطاری قولی بارلیگیدن خبر بیردی.
شاه شهیدده یوزبیرگن واقعهدن کیین، مملکت حربی اکادمیهسی یقینی و کابل هوایی قونلغه میدانی کیریش ایشیگی اونگیده، ایکی خودکش و پارتلش هجوم یوزبیرگنی باعث، پاکستانگه قرشی تنقیدلر کوپهیدی.
شونینگدیک، جمهور رییس خودکش و پارتلش هجوملر کوپیگنی توغریسیده بیر خبری ییغینده حضور کیلتیریب، پاکستاننی افغانستان برابریده صداقت سیزلیککه عیبلهدی. اونینگ ایتیشیچه، افغانستان اوتمیشلرده پاکستانگه دوستلیک پیام یوبارگن، بیراق اوشبو مملکتدن بیزلرگه اوروش پیامی یوباریلگن.
