قندوز ولایتیدن امنیتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، طالبان جنگریلری اوتگن کیچه اوشبو ولایت نینگ علیآباد و خانآباد تومنی اوستیگه هجوم قیلگنلر.
منبع نینگ ایتیشیچه، علیآباد تومنی نینگ مدرسه، خیلیگدا، قاسمعلی و عرضبیگی قیشلاقلری طالبان نظارتیگه اوتگن.
منبع نینگ کوپهیتیریشیچه، اوشبو تومن نینگ مدرسه قیشلاغیده امنیتی کوچلرنینگ ایکی پوستهسی طالبان تامانیدن اوت بیریلگن. منبع گه کوره، آتیشمه عاقبتیده پولیس کوچلریدن ایکی تهسی هلاک و باشقه 5 تهسی یرهلنگن.
اونینگ کوپهیتیریشیچه، طالبان جنگریلری خانآباد تومنی نینگ عکس داوود منطقهسیده امنیتی کوچلرنینگ ایکی پوستهسی اوستیگه هجوم قیلگن و نتیجهده امنیتی کوچلردن 3 تهسی هلاک و باشقه 4 تهسی طالبان قولیگه توشگن.
عینحالده، 217 پامیر قول اردو قومندانلیگی سوزلاوچیسی عبدالهادی نظری نینگ ایتیشیچه، علیآباد تومنیده طالبان گروهی تامانیدن اویوشتیریلگن هجوم کیینگه اوریلگن. اونینگ ایتیشیچه، امنیتی کوچلر تامانیدن اویوشتیریلگن هوایی هجوم عاقبتیده طالبان جنگریلریدن 20 تهسی هلاک و باشقه 15 تهسی یرهلنگن.
217 پامیر قول اردو قومندانلیگی سوزلاوچیسیگه کوره، اوشبو ولایت نینگ دشتارچی تومنیده طالبان بیر پوستهسی هوایی هجوم آستیگه قرار بیریلگن و نتیجهده اسدالله ناملی بیر پاکستانلیک شامل 4 طالب هلاک و باشقه 3 طالب یرهلنگن.
اونینگ کوپهیتیریشیچه، مذکور هجوم ده طالبان گروهیگه تیگیشلی کوپ قطار کمپوتر تخریب و بیر عراده موتر و بیر اسکواتور امنیتی کوچلر قولیگه توشگن.
قندوز امنیتی مسووللری بوتوغریده فکر بیلدیرمهگن.
قندوز حاکمی سوزلاوچیسی عصمتالله مرادی، یالغیز خانآباد تومنیده اویوشتیریلگن هجومنی تصدیقلگن. اونینگ ایتیشیچه، مذکور هجومده پولیس کوچلریدن 3 تهسی هلاک ایتیلگن.
