افغانستان غربیده جایلشگن هلمند ولایتینینگ محلی رسمیلری، ایکّی هفتهدن بیری ولایتنینگ نا برقرار ولسواللیکلریده ذوالفقار ناملی حربی تازهلش عملیات یولگه قوییلگن لیگینی ایتگنلر.
ولایت امنیتی مسووللرینینگ عملیات باره سیده کوپراق خبر بیریش اوچون یرهتگن چیکلاولریگه قرهمسدن، هلمند ولایت اورین باسری محمد جان رسولیار سهشنبه کونی سنگین ولسواللیگی نینگ اون کیلو متری دولت قوراللی مخالفلریدن تازهلنگن لیگینی ایتگن.
رسولیارگه کوره، اوشبو عملیات جریانیده جنگری طالبلرنینگ یوزلب کیشیسی اولدیریلگن. ایتیلیشیچه، افغان ملی کوچلریگه هم زیان ییتگن.
رسولیارنینگ عملیات بارهسیده ایتیشیچه، تینچ اهالیگه تلفات ییتکزمسلیک و یول چیتیگه اورنه تیلگن ماینلرنی بیکار قیلیش اوچون عملیات جریانی سُست کیتیشیگه باعث بولگن.
افغانستان ملی مدافعه وزیرلیگی سوزلاووچیسی نینگ اورین باسری دولت وزیرینینگ سلام طندارگه ایتیشیچه، افغانستان ملی کوچلری جنگریلر تصرفیده بولگن سنگین ولسواللیگی نینگ اون کیلو مترینی تصرف قیلیشگه موفق بولگنلر.
اونگه کوره، بو عملیات اوتکزیلیشی بیلن هنوزگچه 275 عصیانچی طالب اولدیریلگن. شونینگدیک دولت مخالفلری نینگ 100 دن آرتیق اعضاسی یره لنگن. اما، هلمند ولایت ساغلیقنی سقلش تیز یاردم بولیمی نینگ مسوولی یره لنگنلر سانی 150 نفر ایکن لیگینی بیلدیرگن.
وزیریگه کوره، عملیات آقیمده افغانستان ملی کوچلری نینگ 15 حربیسی هلاک ایتیلگن.
اوز نامی فاش ایتیلیشینی ایستمهگن دولت بیر رسمی سینینگ سلام وطندارگه ایتیشیچه، ذوالفقار عملیاتی اوتکزیلیشی بیلن، حاضرگه قدر هم بو ولسواللیکده وضعیت اوزگرمهگن.
هلمند سونگی ایکّی ییلدن بویان مملکت نینگ ناتینچ ولایتلریدن بولیب کیلگن. اوتگن ییللرگه قره گنده امنیت هلی یخشیلشگن. اوتگن اون اوچ ییل جریانیده ولایتنینگ سنگین ولسواللگی نیچه مرته جنگری طالبلر طرفیدن تصرف ایتیلگن.
