افغانستان ملی خوف‌سیزلیک اداره‌سی حقانی ترور ترماغی همده پیشاور کینگشی‌نینگ 30 اعضاسی کابل‌ده قول‌گه آلینگن‌لیگی باره‌سیده خبر بیرگن. قول‌گه آلینگن شخص‌لر کابل‌ده صادر ایتیلگن هجوم و ینه کیله‌جک‌ده انتحاری عمل‌لرنی اویوشتیریشگه عیبله‌نیب حبس گه آلینگنی ایتیله‌دی.
اوشبو اداره تامانیدن نشر ایتیلگن خبرنامه‌ده کیلیشیچه، مذکور 30 کیشی شاه‌شهید، کابل هوا میدانی، تورتینچی مکرویان و افغانستان پارلمان بناسی‌گه اویوشتیریلگن هجولرده قول‌لری بولگن.
خبرنامه، قول‌گه آلینگن‌لرنینگ 10 ته‌سی پیشاور کینگشی و باشقه 20 ته‌سی ایسه حقانی ترور ترماغی‌نینگ اعضالریدن عبارت بولگن لیگینی معلوم قیلگن.
شونینگ‌دیک خبرنامه پیشاور کینگشی گه قره‌شلی اوشبو گروه کابل‌نینگ ده‌سیز ولسوالی ایتیب تعین لنگن جانان نامی بیلن تانیلگن مولوی حکمت‌الله تامانیدن رهبرلیک قیلنه یاتگن‌لیگینی یازگن. مذکور گروه باشلیغی 9 اعضاسی بیلن حبس‌گه آلینگن.
خبرنامه‌نینگ کوپیتیریشیچه، حقانی ترور ترماغی‌نینگ اسراراحمد، ملک و مصطفی ناملی اعضالری شاه‌شهید، هوا میدانی و مکروریان‌ده عمل‌گه آشیریلگن واقعه‌لرنی پلانلشتیریش عاملی بولگن.
افغانستان ملی خوف‌سیزلیک اداره‌سی قول‌گه آلینگن اوشبو گروه کابل‌ده‌گی ییریک ترورچی گروپ‌لردن بولگن لیگینی ایتگن. ملی امنیت اداره‌سی، مذکور گروه کیله‌جک‌لرده کابل شهریده باشقه 13 انتحاری هجومنی صادر قیلیش نیتده بولگن‌لیکلرینی معلوم قیلگن.
ملی امنیت اداره‌سی‌نینگ بیلدیریشیچه، جمهور رییس‌لیک سرایی، کابل‌نینگ شش‌درک منطقه‌سیده‌گی ملی امنیت ریاستی، مدافعه‌وزیرلیگی، امریکه ایلچیلیگی، کابل امنیه قوماندانلیگی، افغانستان پارلمانی و خاتما‌لنبیین بیلیم یورتی اوشبو گروه تامانیدن هجوم آستی‌گه آلینشی نظرده توتیلگن ایکن.
عین حالده ملی امینت خبرنامه‌سیده، مذکور اداره‌نینگ مخصوص کوچلری پکتیا ولایتی‌دن «مرکزی ولایتلر»گه ییتکزیله دیگن ایکی موترگه جایلشتیریلگن 13تن پارتلاووچی ماده‌نی کشف قیلگنی حقیده خبر بیرگن.
ایتیلیشیچه، مذکور پارتلاووچی ماده‌لر حقانی تررو ترماغی اعضالری اختیاریگه قوییلیشی انابت‌گه آلینگن.
ملی امنیت اداره‌سی تامانیدن نشر ایتیلگن ویدیو لوحه‌ده مذکور شخص‌لر اوز عیبلرینی تن آلگن‌لیکلری معلوم قیلینه‌دی.
قول‌گه آلینگن‌لردن بیری‌نینگ ایتیشیچه، بوندن تورت ییل آلدین ابه‌سی‌نینگ اوغلی آرقه‌لی طالب‌لر صفیگه آلیب باریگن و تخار ولایتی باریش بیلن قول‌گه آلینیب عالی محکمه تامانیدن آلتی ییل آزادلیک‌دن محروم ایتیلگن.
طالب‌لر گروهی نینگ مذکور اعضاسی‌گه کوره، ایکی ییل و ایکی آی محبوس مدتینی پل‌چرخی قماقخانه‌سیده اوتکزگندن سونگ آزاد ایتیلیب دکاندارلیک ایشی بیلن شغللنگن. اما، او ینه نیچه وقتدن سونگ قیته‌دن قاری اسحاق ناملی شخص تامانیدن ترغیب ایتیلیب طالب‌لر صفیگه قوشیله‌دی.
سونگی وقت‌لرده کابل ده صادر ایتیلگن هجوملرده اونلب انسان هلاک بولیب یوزلب کیشی تن جراحتی آلگن ایدی. مذکور هجوم‌لرگه عکس المعل بیلدیرگن افغانستان حکومتی مساله اوچون پاکستان‌نی عیبدار بیلگن ایدی.
