کابل‌ده امیریکه رسمی‌لری‌نینگ ایتیشیچه، حکومت باشلیغ‌لری، امیریکه‌نینگ ینگی جمهور رییسی افغانستان‌گه دقت قیلیشینی کوتمس‌دن ترامپ‌نینگ دقتی‌نی جلب ایتیش‌گه حرکت قیلیش‌لری کیره‌ک.
کابل‌ده امیریکه سیلاوی‌نینگ نتیجه‌سی‌نی تیرگاوگه آلیش ییغینده سوزگه چیققن افغانستان بوییچه امیریکه بیلیم یورتی‌نینگ وقتینچه‌لیک باشلیغی دیوید سیدنی‌نینگ ایتیشیچه، حکومت باشلیغ‌لری تیزلیک‌ده ایش‌گه کیریب ترامپ بیلن علاقه قوریش‌لری لازم.
اوشبو امیریکه‌لیک رسمی‌گه کوره، موجود اقتصادی، امنیتی و سیاسی قیین‌چیلیک‌لرگه قره‌گنده، واشینگتن کابل‌نی یالغیز قویمه‌یدی و بونده‌ی شرایط‌ده افغانستان خصوصیده ترامپ‌نینگ دقتی‌نی جلب ایتیش ممکن.
کابل- اسلام‌آباد علاقه‌سی و افغانستان تینچلیک لایحه‌سی خصوصیده دیوید سیدنی‌نینگ ایتیشیچه، بو ایچکی موضوع بولگن، واشینگتن هیچ بیر مملکت‌نینگ ایچکی موضوعی‌گه اره‌لشمه‌یدی.
شونینگ‌دیک، اوشبو بیانات‌لرنی تصدیق‌لگن تینچلیک عالی کینگشی‌نینگ تشقی ایشلر بوییچه مصلحتچیسی محمداسماعیل قاسمیارنینگ ایتیشیچه، امیریکه باشقه مملکت‌لر بیلن علاقه قورمس‌دن ایشی‌گه دوام بیره‌آلمه‌یدی.
جناب قاسمیارنینگ کوپه‌یتیریشیچه، امیریکه‌نینگ ینگی جمهور رییسی، سیلاو کمپاین‌لری جریانیده ایتگن سوزلرینی عمل‌گه آشیرگن صورتده، افغانستان‌ده دایمی تینچلیک تأمین‌لنه‌دی.
بیراق، سلام‌وطندار بیلن صحبت اوتکزگن سابق جمهور رییس‌نینگ مصلحتچیسی فاروق اعظم‌نینگ ایتیشیچه، امیریکه عملی شکلده افغانستان ایشی‌گه اره‌لشه‌دی و کابل- اسلام‌آباد علاقه‌سی ساووقلشگنی خصوصیده واشینگتن‌نی اره‌لشمه‌سی بهانه‌دن باشقه نرسه ایمس.
میلادی 2016- ییل سیلاوی‌ده دونالد ترامپ‌نینگ جنجل‌لی بیانات‌لری، برچه‌نی باشی‌ده قالدی. او، مکزیک قاچقین‌لری‌نی تجاوزچی و قاچاقچی بیلیب ایتیشیچه، مکزیک چیگره‌سیده دیوار تارتیب ناقانونی قاچیقن‌لرنینگ آلدینی آله‌دی. نیچه آی‌دن کیین، امیریکه گه کیره‌دیگن مسلمان‌لرنی هم آلدینی آلیشی‌نی بیلدیردی.
اوشبو امیریکه‌لیک سوداگر، نیچه آی‌لیک سیلاو کمپاینی‌دن کیین، کوپینچه آواز بیلن آق سرای‌گه یول تاپدی.
