افغانستان جمهور رییسی نینگ ملی امنیت بوییچه مصلحتچیسی محمدحنیف اتمر هندوستانگه سفر قیلگن. سیاست شناسلر اوشبو سفر اهمیتی اوستیده تاکیدلهیدیلر. ایتیلیشیچه جناب اتمر هندوستان بلند مرتبهلی رسمیلری بیلن ترورچیلیککه قرشی کورهش همده هندوستاننی افغان حربی کوچلری زمانوی قورال – یراقلر بیلن تامینلهشی بارهسیده بحثلشهدی.
اتمرنی هند سفری عرفهسیده هم رسمی دهلی نینگ بیر قطار بلند مرتبهلی رسمیلری بیلن تیلفون آرقهلی بیر نیچه بار سوزلشگنی ایتیلهدی. افغان رسمیسی، جمهور رییس غنی حاکمیت تیپه سیگه کیلگنیدن سونگ پاکستان همکارلیگیده افغانستانده برقرارلیک اورنهتیش یونهلیشیده عملگه آشیرگن سعی و حرکتلری کوتیلگن نتیجهلر آلیب کیلمهی رسمی کابل و اسلامآباد مناسبتلری ترهنگلشگن بیر زمانده دهلی گه بارهدی.
افغانستان سابق جمهور رییسی حامد کرزی هم بیر نیچه بار قورال اسلحه سورهب هندوستانگه مراجعت قیلگن ایدی. رسمی دهلی افغانستان حکومتی نینگ اوشبو ایستهکلریگه ایجابی جواب قیترمه گن ایدی. افغانستان جمهور رییسی نینگ ملی امنیت بوییچه مصلحتچیسی نینگ دهلی سفری قندهی نتیجهلر آلیب کیلیشی بارهسیده آلدیندن بیران نرسه دییش قیین البته.
رسمی دهلی اوزی نینگ تاریخی رقیبی سنلمیش پاکستاننی چوچیتمسلیگی اوچون افغانستانگه کته مقدارده حربی قورال اسلحه ییتکزیب بیرمسلیگی ممکن. افغانستاننی هم اوز حربی کوچلرینی هندوستاندن قورال اسلحهلری بیلن تامینلشیگه کته امید باغله مسلیگی لازم.
چونکه هندوستان بیر تاماندن باشقه دولتلرگه کته مقدارده قورال اسلحهلر ساتیش امکانیگه ایگه ایمس. قالهویرسه هند دن قولگه کیریتیلهدیگن آغیر قورال یراقلرنی افغانستانگه ییتکزیش هم آسان کیچمهیدی. هندوستان دولتی بوندن تخمینن بیر ییل آلدین اوچ تیک اوچر (هیلی کوپتر) نی یاردم طرزده افغانستان دولتیگه تارتیق قیلگن ایدی. یقین کیلهجکده تورت MI25 رسوملی تیک اوچرنی افغانستانگه یاردم کورستیشی کوتیلهدی.
افغانستان خوفسیزلیک کوچلرینی موجود وضعیتده حربی تیک اوچرلرگه جدی احتیاجی بارلیگی هیچ کیمگه سِر ایمس. قندوز ولایتی مرکزی جنگری طالبلر اشغالیگه اوتگنیده افغانستان رسمیلری ناتو و امریکا حربیلریگه مراجعت قیلیب، طالبلر موضعلرینی هوادن نشانگه آلیشلرینی سورهگن ایدیلر.
در واقع امریکا حربی کوچلری نینگ هوا هجوملری نتیجهسیده قندوزنی طالبلر اشغالیدن آزاد ایتیشلیک امکانی مهیا ایتیلگن ایدی. حاضرگی وضعیتده افغانستان دولتینی مملکت ملی کوچلرینی حربی قورال اسلحهلر بیلن تامینلشده هندوستانگه سوینمسلیگی کیرهک. نیگه دیگنده:
1. هندوستان افغان حربی کوچلری احتیاج بولگن قورال اسلحهلرنی افغانستانگه ییتکزیب بیریش امکانلریگه ایگه ایمس.
2. بو نرسه قوشنی پاکستاننی افغانستانگه قرشی عضبینی بیر نیچه برابرگه آشیریب، مملکت ایچکریسیده دولتگه قرشی اوروشهدیگن جنگریلرنینگ هجوملری بیر نیچه برابرگه آشیشیگه آلیب کیلیشیگه سبب بولهدی.
3. رسمی اسلامآباد بو نرسهنی بهانه آلیب اسلامی دولتلر اینیقسه عرب دولتلرینی رسمی کابلگه قرشی تحریک ایتیشی ممکن. افغانستان دولتینی اوزی نینگ پاکستان و هندوستان مناسبتلریده موازنت و اعتدالنی نظرده توتیب ایکله تاماننی راضی اسرهش اوچون بار امکانلردن فایدهلنیشی ضرور.
افغانستان هوا کوچلری قیته تیکلنمهگن اوتگن اون اوچ ییل دوامیده افغانستان حربی کوچلرینی قیته تیکلش اوچون ناتوگه اعضا دولتلر اینیقسه امریکا میلیاردلب دالر صرفلهدی. در واقع مملکت حربی کوچلری امریکا یاردمی اساسیده اوز ایاقلری اوستیده استوار تورگن.
موجود شرایطده افغان حربی کوچلری اوچون اوته مهم سنهلگن هوا کوچلری هلی تیکلنمهگن. غرب دولتلری نینگ بو توغریده بیرگن وعدهلری هم تولهلیگیچه عملگه آشمهگن.
قندوز ولایتی طالبلر اشغالیگه اوتیشی شونینگدیک کیینگی آیلرده مملکت شمالیده یوز بیرگن جنگلر امریکا و ناتوگه اعضا دولتلردقتینی بو مسالهگه جلب ایتگنگه اوخشهیدی. یقینده افغانستان ملی مدافعه وزیرلیگی امریکانی افغانستان اوچون 20 حربی طیاره ساتیب آلگنینی تأکیدلب، مذکور اوچاقلردن اوچتهسینی یقینده افغانستان تامانیگه تاپشیریلیشینی بیلدیرگن ایدی.
افغانستان بلند مرتبهلی رسمیلری هم زمانوی قورال اسلحهلر اینیقسه حربی تیک اوچرلر سورهب روسیه گه مراجعت قیلگنلر. رسمی مسکو هم افغانستان تکلیفلرینی یقیندن اورگهنیب کیرهک بولگن حربی تخنیکلرنی افغانستانگه ییتکزیب بیریشلیککه تیار ایکنینی بیلدیرگن.
حاضرگی کونده افغان رسمیلرینی مملکت حربی کوچلرینی طالبان و ترورچیلرگه قرشی موفقیتلی کورهش آلیب باریش اوچون حربی قورال یراقلرگه بولگن احتیاجی کته. رسمی کابلنی همهدن آلدین افغانستان کوچلرینی لازم قوراللر بیلن تامینلهش اوچون اوزی نینگ غربی همکارلری ناتو و امریکا گه مراجعت ایتیشی لازم.
امریکا و ناتوگه اعضا دولتلرنی بو خصوصده کوندیریش اوچون مناسب بیر شرایط وجودگه کیلگن. افغانستان نینگ غربلیک حامیلری بو مملکتدهگی قَلتیس وضعیت بارهسیده شو کیچه کونلرده باش قاتیرماقدهلر.
بوندن تخمینن بیر آیدن سونگ بروکسلده ناتوگه اعضا دولتلر افغانستان بارهسیده مهم بیر ییغین اوتکزهدیلر. رسمی کابل اوشبو ییغینده لازم تیارگرلیک بیلن قتنهشیب اوز احتیاجلرینی تامینلهشی خصوصیده مذکور دولتلرگه جدی بیر شکلده مراجعت ایتیشی کیرهک.
حاضرگی کونده غرب دولتلری افغانستاننی اوز حالیگه قوییب کیته آلمهیدیلر. بو نرسهنی ناتوگه اعضا دولتلر جملهدن امریکا بلند مرتبهلی رسمیلری بار بار تیلگه آلگنلر. یقینده پایتخت کابلگه سفر قیلگن امریکالیک سناتورلر اوز سوزلریده " افغانستان اوروشینی امریکا اوروشی" دیگنلر.
افغانستان غرب دولتلرینی مملکت کوچلرینی اوزاق مدت اوچون زمانوی قورال اسلحه بیلن تامینلهشلری بارهسیده راضی قیلیشلریگه کته احتیاج سیزیلهدی. اصلیده غرب دولتلری یاردمی اساسیده افغان کوچلری اوچون کیرهک بولگن قورال یراقلرنی روسیهدن ساتیب آلیش ضرور. چونکه حربی متخصصلر فکریچه روسیهده ایشلب چیقریلگن قوراللر افغانستان شرایطیده یخشی راق طلبگه جواب بیره آلهدی.
ایکینچیدن روسیه قوراللرینی غرب قوراللریگه نسبتن ارزانراق نرخده قولگه کیریتیش ممکن. آلدینراق اشاره قیلگنیمیزدیک، افغانستاننی اوز حربی کوچلرینی هندوستان آرقهلی قورال اسلحهلر بیلن تامینلهشی بارهسیدهگی امیدلری نه فقط ایجابی نتیجهلر آلیب کیلمهیدی بلکه موجود معمالرنی تاباره چیگللشتیرهدی.
افغانستان ملی مصلحتچیسی محمدحنیف اتمرنینگ هندوستان سفری بیر نیچه جهتدن اهمیت کسب ایتهدی. بیرینچیدن سونگی آیلرده افغانستاننی پاکستان بیلن یقینلهشیش اوچون عملگه آشیرگن سعی و حرکتلری رسمی دهلی خاطرینی آزرده قیلگن ایدی.
اوشبو سفر کابل – دهلی ارا دوستانه مناستلرنی یخشیلشگه خذمت قیلیشی ممکن. ایکینچیدن بو سفرقندهی دیر پاکستانگه قرشی سیاسی باسیم حسابلنهدی.
