سناتورلردن بیرقطارینینگ ایتیشیچه، افغانستان حکومتی پاکستاندن تینچلیک لایحهسیگه همکارلیک قیلیش خصوصیده، دنیا حضوریده کفالت (ضمانت) آلیشی کیرهک.
اوشبو سناتورلرگه کوره، پاکستان بوندن آلدین، افغانستان تینچلیگی خصوصیده، بیرگن سوزلریدن هیچ بیرینی عملگه آشیرمهگن.
سناتورلردن بیری گلمحمد عظمینینگ، بوگون (سهشنبه) سنامجلسی عمومی ییغینیده ایتیشیچه، افغانستان حکومتی پاکستان اوستیگه فشار کیلتیریب و بو مملکتدن تینچلیککه همکارلیک قیلیش اوچون، دنیا حضوریده کفالت آلیشی لازم. اونگه کوره، ایکی مملکت اورتهسیده شوندهی کفالت بولمهگن صورتده، تینچلیک سوزلشوولری نتیجه بیرمهیدی.
سناتورلردن باشقه بیری شیرمحمد آخندزادهنینگ ایتیشیچه، افغانستان رسمیلری پاکستاننینگ تکراری سوزلریگه ایشانمسلیگی کیرهک. آخندزادهنینگ ایتیشیچه، پاکستان نیچه مرته تینچلیک سوزلشوولرینی قیینچیلیککه دوچ کیلتیرگن.
اوشبو سناتور ایشانچیگه کوره، پاکستان تینچلیک سوزلشوولری توغریسیده افغانستان رسمیلرینی اورینتیریب، مملکتده اوروش دوام ایتیشی خصوصیده، سعی و حرکت قیلهدی.
شونینگدیک، سناتورلردن باشقه بیرقطاری، پاکستاننی تاریخ دوامیده افغانستان ناتینچلیکلری دوام ایتیشی توغریسیده سعی و حرکت قیلیشگه عیبلهدی.
دیمک افغانستان بیلن پاکستان اورتهسیدهگی علاقه یخشیلنیشی خصوصیده، سعی و حرکت بولگن چاغیده، افغانستان اینیقسه ناتینچلیکلر کابلده کوپهیگن.
جمهور رییس غنی، اوتگن (دوشنبه کون) کیچ قورون، پاکستان باش وزیری نوازشریف بیلن پاریسده اوچرهشدی. جناب غنی، اقلیم اوزگریش ییغینیده اشتراک ایتیش اوچون، آلتی کونلیک سفرده اروپا بارگن و پاریسدن کیین، ایتالیا، آلمان و سویدن هم سفر قیلیشی ممکن.
